मुख्य समाचारफ्रन्ट पेजसमाचारदृष्टिकोणअर्थअन्तर्वार्तामल्टिमिडियाखेलकुदविश्वप्रवासकोरोना अपडेटकर्नर किकसम्पादकीयस्वास्थ्य र जीवनशैली१३औँ वार्षिकोत्सव विशेषांकसाहित्यफिचरलाेकसेवा१४औँ वार्षिकोत्सव विशेषांकप्रेरक प्रसंग१२औँ वार्षिकोत्सव विशेषांकसप्तरंगटर्निङ प्वाइन्ट्स-२०१९टर्निङ प्वाइन्ट्स-२०२०प्रदेशब्लगEnglishटर्निङ प्वाइन्ट्स-२०२१
  • वि.सं २०७८ असोज ३ आइतबार
  • Sunday, 19 September, 2021
२०७८ श्रावण ८ शुक्रबार २०:०२:००
Read Time : > 2 मिनेट
मुख्य समाचार डिजिटल संस्करण

गण्डकी मन्त्रिपरिषद्ले पायो ४२ दिनपछि पूर्णता : यी हुन् नयाँ मन्त्री  

Read Time : > 2 मिनेट
२०७८ श्रावण ८ शुक्रबार २०:०२:००

गण्डकी प्रदेशमा नयाँ सरकार गठन भएको ४२ दिनपछि शुक्रबार मन्त्रिपरिषद्ले पूर्णता पाएको छ । २९ जेठमा नेपाली कांग्रेस संसदीय दलका नेता कृष्णचन्द्र नेपाली पोखरेल मुख्यमन्त्रीमा नियुक्त भएका थिए । सोही दिन मुख्यमन्त्रीसँगै चार मन्त्रीले शपथ खाएका थिए । मुख्यमन्त्रीले नियुक्त भएको ४२ दिनपछि थप ६ मन्त्री नियुक्त गर्दै मुख्यमन्त्रीले मन्त्रिपरिषद् विस्तारसँगै पूर्णता दिएका हुन् । 

हाल प्रदेशमा ११ मन्त्रालय रहेका छन् । ११ मन्त्रालयमध्ये नेपाली कांग्रेसले मुख्यमन्त्रीसँगै पाँच, नेकपा माओवादी केन्द्रले चार, जनता समाजवादी पार्टी र स्वतन्त्रले एक–एक मन्त्रालयको जिम्मा पाएका छन् ।शुक्रबार नियुक्त भएका ६ जना मन्त्रीमध्ये कांग्रेस र माओवादीका तीन–तीनजना रहेका छन् । कांग्रेसका तर्फबाट बाग्लुङका मणिभद्र शर्मा कँडेल पर्यटन, उद्योग, वाणिज्य तथा आपूर्ति, स्याङ्जाका मेखलाल श्रेष्ठ शिक्षा, संस्कृति, विज्ञान प्रविधि तथा सामाजिक विकास र कास्कीका बिन्दुकुमार थापा कानुन, सञ्चार तथा प्रदेश मामिलामन्त्रीमा नियुक्त भएका हुन् । 

यसैगरी माओवादीतर्फबाट रामजी बराल अर्थ, बाग्लुङका चन्द्रबहादुर बुढा भूमि व्यवस्था, कृषि, सहकारी तथा गरिबी निवारण र स्याङ्जाका दीपक चर्तीमगर वन, वातावरण तथा भूसंरक्षणमन्त्री नियुक्त भएका छन् । नियुक्त मन्त्रीहरूलाई प्रदेश प्रमुख सीताकुमारी पौडेलले शपथ खुवाएकी थिइन् ।

एक मन्त्रीको जिम्मेवार हेरफेर      

२९ जेठमा नियुक्त मुख्यमन्त्रीले प्रदेशमा रहेका ११ मन्त्रालयको जिम्मा सबै आफैँले राखेर अन्य चार मन्त्रीलाई विनाविभागीय मन्त्रीमा नियुक्त गरेका थिए । गठबन्धन बनाएका चार दलमा कुन मन्त्रालय कसले लिने भन्ने विषयमा सहमति नहुँदा मन्त्रीहरूलाई कुनै जिम्मा दिइएको थिएन ।

विनाविभागीयमन्त्री नियुक्त भएको १६ दिनपछि १३ असारमा मुख्यमन्त्रीले कांग्रेसका कुमार खड्कालाई शिक्षा, संस्कृति, विज्ञान प्रविधि तथा सामाजिक विकास, माओवादीकी मधुमाया अधिकारीलाई स्वास्थ्य तथा जनसंख्या, जसपाका हरिशरण आचार्यलाई ऊर्जा, जलस्रोत तथा खानेपानी र स्वतन्त्र सांसद राजीव गुरुङ उर्फ दीपक मनाङेलाई युवा तथा खेलकुद मन्त्रालयको जिम्मा दिने तयारी गरेका थिए । तर, चार मन्त्रीमध्ये खड्का र अधिकारीले मुख्यमन्त्रीले तोकेको मन्त्रालय सोही दिन स्वीकार गरे पनि आचार्य र मनाङेले अस्वीकार गरेका थिए ।

१३ असारमा मुख्यमन्त्रीले तोकेको मन्त्रालयको जिम्मा लिन अस्वीकार गरेका आचार्य र मनाङेले नियुक्त भएको ३० दिनपछि २७ असारमा सोही मन्त्रालयको जिम्मा सम्हालेका थिए । शुक्रबार मन्त्रिमण्डलले पूर्णता पाएसँगै १३ असारमा शिक्षा, संस्कृति, विज्ञान प्रविधि तथा सामाजिक विकास मन्त्रालयको जिम्मा पाएका कांग्रेसका खड्काको जिम्मेवारी हेरफेर गर्दै उनलाई भौतिक पूर्वाधार, सहरी विकास तथा यातायात व्यवस्था मन्त्रालयको जिम्मा दिइएको छ ।

यसो भन्छन् अन्तिम समयमा मन्त्रीको सूचीबाट  हटाइएका विश्वकर्मा
गण्डकीमा बिहीबार मन्त्रिमण्डल विस्तार गर्ने तयारीमा मुख्यमन्त्री रहेका थिए । ५ बजेसम्म माओवादीका तर्फबाट मन्त्री हुनेहरूको नाम नआएपछि बिहीबार हुने भनिएको मन्त्रिमण्डल विस्तार रोकिएको थियो ।बिहीबार मन्त्रिमण्डल विस्तार भएको भए कांग्रेसका तर्फबाट मणिभद्र शर्मा कँडेल, मेखलाल श्रेष्ठ र डोबाटे विश्वकर्मा मन्त्री नियुक्त हुने करिब पक्काजस्तै थियो । शुक्रबार बिहान करिब ११ बजेसम्म कांग्रेसका तीनैजनाको नाम नयाँ नियुक्त हुने मन्त्रीको सूचीमै रहेको थियो । तर, ११ बजेपछि तीनमध्ये विश्वकर्माको नाम सूचीबाट हटाएर कास्कीका बिन्दुकुमार थापालाई मन्त्री नियुक्त गरिएको थियो ।

अन्तिम समयमा नाम काटिएका विश्वकर्मालाई नयाँ पत्रिकाले सम्पर्क गर्दा उनले आफूले पार्टीका लागि जीवनसँगै रगत र पसिना बगाए पनि आफूले गरेको योगदानको कदर र मूल्यांकन नभएको र पार्टीले समेत नगरेको भन्दै असन्तुष्टि जनाए । आफू उमेरसँगै पार्टीमा गरेको योगदान, लगनशीलतासँगै हरेक क्षेत्रबाट हेर्दा प्रदेशमा दुई तीनजना नेताभित्र पर्ने दाबी उनको थियो ।

मन्त्रीका लागि शुक्रबार बिहान करिब ११ बजेसम्म आफ्नो नाम रहे पनि अन्तिममा आएर कसरी र कसले आफ्नो नाम हटायो भन्नेमा चकित परेको बताए । अन्तिम समयमा आएर आफनो नाम काटिनु विचित्रको संयोग रहेको भनाइसमेत उनको छ । गण्डमी मन्त्रिमण्डल नेपालको संविधानअनुसार समावेशी नरहेको आरोपसमेत उनको छ । ६५ वर्षका उनले आफूले सधैँ पार्टीको अनुशासन पालन गरेको स्मरण गर्दै मन्त्रीका लागि नजिकमा पुग्दासमेत वञ्चित हुनुपरेको भन्दै दुःखेसो व्यक्त गरे ।