अर्थ प्रिन्ट संस्करण

छुट मूल्यमा खाद्यान्न  खरिद गर्न उपभोक्ताको भिड

निषेधाज्ञाको समयमा उपभोक्तालाई राहत दिन निश्चित खाद्यान्न खरिदमा २० प्रतिशत छुट पाउन थालेपछि साल्ट ट्रेडिङ कर्पोरेसन र खाद्य व्यवस्था तथा व्यापार कम्पनी लिमिटेडको बिक्री केन्द्रमा उपभोक्ताको भिड बढेको छ । २१ जेठदेखि साल्ट ट्रेडिङले भक्तपुरको सूर्यविनायक, जडीबुटी, जावलाखेल, कालिमाटी र सतुंगलमा बिक्री केन्द्रबाट २० प्रतिशत छुटसहित उपभोग्य सामान बिक्री गर्दै आएको छ ।

कम्पनीले पिठो ४४ रुपैयाँ, चिनी ६३.२० रुपैयाँ, नुन १६ रुपैयाँ, भटमासको तेल १ सय ८८ रुपैयाँ र खाना पकाउने एलपी ग्यास १ हजार १ सय २० रुपैयाँमा उपभोक्तालाई बिक्री गरिरहेको छ । त्यस्तै, खाद्य कम्पनीले रामशाहपथ, थापाथली, ललितपुरको नख्खु र भक्तपुरको सूर्यविनायकबाट चामल र कर्णालीको सिमी बिक्री गरिरहेको छ ।

साल्ट ट्रेडिङको प्रधान कार्यालय रहेको कालिमाटी र सतुंगलस्थित शाखा कार्यालयको बिक्री केन्द्रमा उपभोक्ताको भिड अत्यधिक देखिएको छ । पछिल्लो तीन दिनमा भिड बढेपछि नियन्त्रण गर्न प्रहरीलाई समेत गाह्रो भइरहेको साल्ट ट्रेडिङका सहायक महाप्रबन्धक कुमार राजभण्डारीले बताए ।

‘प्रहरीले माइकिङ गरेर भिड नगरी सामान खरिद गर्नुस् भन्दा पनि उपभोक्ताले ध्यान दिएका छैनन्,’ उनले भने, ‘कार्यालयमा धेरै भिड बढ्ने गरेको छ ।’ कम्पनीको बिक्री केन्द्रमा दिनहुँ भिड बढ्न थालेपछि स्थानीयले त्यहाँबाट बिक्री केन्द्र नहटाए कोरोना भाइरसको संक्रमण बढ्ने भन्दै प्रहरीलाई उजुरीसमेत गरेका छन् ।

साल्ट ट्रेडिङ कर्पोरेसनमा कार्यरत कर्मचारी  बिक्री भएको सामानको हिसाब गर्दै ।

त्यसपछि प्रहरीसँगको समन्वयमा साल्ट ट्रेडिङले मंगलबारबाट बिहान ७ देखि ९ बजेसम्म मात्रै बिक्री केन्द्र खोलेर सेवा दिने भएको छ । ‘अब बिहान मात्रै बिक्री केन्द्र खोलेर सामान दिने निर्णय गरेका छौँ,’ उनले भने, ‘बिहान ९ बजेसम्म बिक्री केन्द्र आइसकेकाले भित्र राखेर सामान दिने व्यवस्था मिलाउँछौँ ।’

छुटसहितको मूल्यमा खाद्यान्न दिन थालेपछि तीन गुणा बिक्री बढेको राजभण्डारीले बताए । ‘निषेधाज्ञा सुरु भएयता उपत्यकाको बिक्री केन्द्रबाट दैनिक करिब १ लाख रुपैयाँको खाद्यान्न बिक्री हुने गरेको थियो,’ उनले भने, ‘अहिले दुई दिनमा ८ लाख ४७ हजार रुपैयाँको बिक्री भएको छ ।’ बिक्री करिब चार गुणाले बढ्दा भिडसमेत अनियन्त्रित हुँदै गएको उनले बताए ।

साल्ट ट्रेडिङले सबै बिक्री केन्द्रका कर्मचारीलाई मास्क, पन्जा, स्यानिटाइजर, पिपिई सेट दिएर सुरक्षा सावधानी अपनाएको तथा उपभोक्तालाई बिक्री केन्द्र प्रवेश गरेपछि साबुनपानीले हात धुने व्यवस्था मिलाएको उनले बताए । हाल छुट उपलब्ध गराइएको खाद्यान्न मात्रै खरिद गर्ने उपभोक्ता आउने गरेको उनको भनाइ छ ।

त्यस्तै, खाद्य कम्पनीमा पनि भिड धेरै हुने गरेको सूचना अधिकारी शर्मिला न्यौपाने सुवेदीले जानकारी दिइन् । ‘हामीले २१ जेठबाटै ७ देखि ९ बजेसम्म छुट मूल्यमा खाद्यान्न बिक्री गरिरहेका छौँ,’ उनले भनिन्, ‘बिहान ९ बजेपछि गेट बन्द गर्ने र त्यतिवेलासम्म आएकालाई कार्यालयभित्र लाइन लगाएर खाद्यान्न बिक्री गर्दा १२ बज्ने गरेको छ । त्यसैले भिड त धेरै नै बढ्ने गरेको छ ।’

चामलमा २० प्रतिशत छुट दिँदा प्रतिबोरा करिब ३ सय सस्तो पर्छ । कम्पनीले अरुवा मोटा, अरुवा मकवानपुर, अरुवा सोना मसिनो, स्टिम सोना मसिनो, अरुवा मध्यम, स्टिम रञ्जित, स्टिम जिरा मसिनो चामलमा छुट दिएको छ । यसमध्ये जिरा मसिनो चामलको बिक्री बढी छ ।

कम्पनीले बासमती र जुम्लाको मार्सी चामल बिक्री गर्ने भएपछि यसमा छुट भने उपलब्ध गराएको छैन । ‘यसवेला सीमित कर्मचारीबाट सेवा दिइरहेका छौँ । अर्कातिर २० प्रतिशत छुट कार्यान्वयनमा आएपछि उपभोक्ताको भिड बढेको छ,’ सुवेदीले भनिन्, ‘यद्यपि, हामीले कर्मचारीलाई उचित सुरक्षा सावधानी अपनाउन लगाएर सेवा दिइरहेका छौँ ।’ कम्पनीले छुट मूल्यमा एक बोरा चामल र २ किलो कर्णालीको सिमी दिइरहेको छ । खाद्यले तीन दिनमा १ सय ३७ क्विन्टल चामल बिक्री गरेको छ ।