सिराहामा बोक्सी आरोपमा महिलालाई यातना

गाईलाई टुना लगाएर मारेको भन्दै कुटपिट गरी जबर्जस्ती मलमूत्र खुवाइयो, घटना सार्वजनिक नगर्न स्थानीयको दबाब, गाउँमै मिलापत्रको तयारी

सिराहामा बोक्सी आरोप लगाउँदै एक महिलालाई यातना दिइएको छ । औरही गाउँपालिका–५ की ५० वर्षीया हिरादेवी साहलाई शनिबार बिहान साढे ६ बजे भतिजा र बुहारीहरूले बोक्सी आरोपमा कुटपिट गरी जबर्जस्ती मलमूत्र खुवाएका छन् ।

गाईलाई टुना गरेर मारेको आरोपमा आफूमाथि जेठाजुका छोरा र बुहारीले कुटपिट गर्दै मानव मलमूत्र खुवाएको हीरादेवीले जानकारी दिइन् । भतिज घुरन साहले हात समातेर भुइँमा लडाएको र बुहारीहरू कौशिला, निशा र कविताले जबर्जस्ती मानव मलमूत्र खुवाएको उनले बताइन् ।

हीरादेवीका श्रीमान् रामचलितर साह रोजगारका क्रममा भारतको चण्डीगढमा छन् । उनी छोराछोरीसहित घरमा बस्दै आएकी छन् । दुई छोरी र एक छोरामध्ये जेठी छोरी मात्र घरमा भएको मौका पारी आफूमाथि अमानवीय काम गरेको भन्दै उनले दोषीलाई कारबाहीको माग गरेकी छिन् । तर, घटना लुकाउन हीरादेवीलाई स्थानीयले दबाब दिएका छन् । बोक्सी आरोपमा कुटपिट गर्ने र मलमूत्र खुवाउने घटनाका दोषीलाई कानुनी कारबाही गर्नुको सट्टा स्थानीय अगुवा गाउँमै मिलापत्रको तयारीमा जुटेका छन् । घटनाको उजुरी गर्न प्रहरी चौकी औरही पुगेकी साहलाई स्थानीय श्रीदेव यादवलगायतले गाउँमै मिलापत्र गर्ने गरी फर्काएर ल्याएका छन् । यादवले आफन्तबीचको घटना भएकाले प्रहरीमा मिल्नुभन्दा गाउँमै मिल्नु राम्रो हुन्छ भनेर फर्काएको बताए । कुटपिटको घटना सुन्नमा आएकाले आफूले गाउँमै मिलापत्रको लागि प्रहरीमा जानबाट फर्काएको उनको भनाइ छ ।

२ वैशाखमा मिथिला क्षेत्र जुडशीतल पर्व मनाउँदै थियो । हीरादेवी जेठाजुका छोराबुहारीलाई पानी छर्केर आशीर्वाद दिन उनीहरूको घर पुगिन् । पानी छर्किने क्रममा घरमा रहेको गाईमाथि पानी प¥यो । त्यो पानी घुरनले आफैँ गाईमाथि खन्याएका थिए । जिउमा पानी परेको गाईको शनिबार बिहान मृत्यु भयो । गाई मरेको जानकारी घुरनले श्रीमती विन्दीलाई दिए । ‘गाई मरेको देखेपछि बुहारीलाई सुनाए,’ पीडित हीरादेवीले भनिन्, ‘त्यो सुन्नेबित्तिकै तथानाम गाली गर्न थाल्यो । सडकमा घिसार्दै कुटपिट गर्न थाल्यो । घुरनले पाखुरा र हात समातेर भुइँमा लडायो । बुहारीहरूले जबर्जस्ती मलमूत्र मुखमा कोचे ।’ गाई मारेको झुटो आरोप लगाएर सडकमा आफूलाई मलमूत्र खुवाउँदा पनि गाउँलेले रमिता मात्र हेरेको उनले गुनासो गरिन् ।

घटनापछि घुरन साह फरार
बोक्सी आरोप लगाउँदै काकीलाई यातना दिने घुरन साह फरार भएका छन् । प्रहरीले सो घटनामा संलग्न कौशिला, निशा र कवितालाई पनि नियन्त्रणमा लिएको छैन । प्रहरी चौकी औरहीका इन्चार्जसमेत रहेका प्रहरी सहायक निरीक्षक (असइ) कलानन्द यादवले महिलालाई कुटपिट गरेको सूचनाका आधारमा अनुसन्धान थालेको बताए । घटनास्थलमा पुगेपछि महिलाको शरीरमा पानीजस्तो केही छर्केको देखिए पनि मलमूत्र हो÷होइन यकिन भन्न नसकिने उनको भनाइ छ । घटनाबारे लिखित उजुरी नआएकाले कसैलाई नियन्त्रणमा नलिइएको यादवले बताए । सिराहाका प्रमुख जिल्ला अधिकारी प्रदीपराज कँडेलले बोक्सी आरोपमा अमानवीय कार्य गर्नेलाई कानुनी दायरामा ल्याउन जरुरी भएको बताए । घटनामा संलग्नलाई चाँडै पक्राउ गरी कानुनी कारबाही गरिने उनले जानकारी दिए ।

समाचार संकलन गर्न गएका पत्रकारमाथि दुर्व्यवहार
बोक्सीको आरोपमा महिलामाथि अमानवीय व्यवहार भएको घटनाको समाचार संकलन गर्न पुगेका पत्रकारमाथि दुर्व्यवहार गरिएको छ । नयाँ पत्रिकाकर्मी सुरेन्द्रकुमार कामति र एभिन्यूज सिरहा संवाददाता शुभनारायण कामतीलाई आरोपित पक्षका रामचन्द्र साहले दुव्र्यवहार गरेका हुन् । गाउँमै घटना मिलाउन चाहेको, तर पत्रकारको टोली पुगेपछि घटना बाहिरिने र कारबाही हुने भयपछि साहले गालीगलौज गर्दै पटक पटक कुटपिट गर्ने धम्की दिएका थिए । आफ्नै घर अगाडिको सडकमा आफूलाई पटक पटक धम्की दिएको एभिन्यूजकर्मी कामतीले बताए । असुरक्षा महसुस भएपछि स्थानीय प्रहरीलाई खबर गरेका थिए । 
पत्रकार महासंघ सिरहाले घटनाको भत्र्सना गरेको छ । महासंघ सिरहा अध्यक्ष मनोज बनैताले समाचार संकलन गर्न पुगेका पत्रकारद्वयलाई गालीगलौज र कुटपिटको धम्की स्वतन्त्र प्रेसप्रतिको आक्रमण भएकोले दोषीलाई कारबाही गर्न माग गरेका छन् ।  

गाउँमै मिलाउन प्रहरीमा उजुरी हाल्न नदिएको हो :  स्थानीय श्रीदेव यादव
कुटपिटको घटना सुन्नमा आयो, आफन्तबीचको मामिला भएकाले प्रहरीमा गएर मिलापत्र गर्नुभन्दा गाउँमै मिल्नु राम्रो हुन्छ भनेर फर्काएको हुँ । अब गाउँमै पञ्चायत हुन्छ ।

९ महिनाअघि बोक्सी आरोपमा मूर्तिदेवीलाई यातना दिने धरौटीमा छुटे

गत २८ भदौमा सिराहाको नवराजपुर गाउँपालिका–५ कुर्सन्डीकी ४५ वर्षीया मूर्तिदेवी यादवलाई बोक्सीको आरोपमा मरणासन्न हुने गरी कुटपिट गर्दै मलमूत्र खुवाइएको थियो । बोक्सी आरोप लगाउँदै राति नै पञ्चायत बोलाएर छिमेकीहरू धर्मनाथ यादव, सन्तोष यादव, देवनाथ यादव, पशुपति यादव, वैद्यनाथ यादव, महेश यादव, कृष्ण यादव, ब्रह्म यादवलगायतले मूर्तिदेवीमाथि कुटपिट गरेका थिए । कुटपिटपछि मूर्तिदेवीको चिउँडो तथा गालाको हड्डी भाँचिएको थियो । घटनाका आरोपीमध्ये धर्मनाथ यादवका छोरा २५ वर्षीय सन्तोष यादवलाई गत १८ कात्तिकमा जिल्ला अदालत सिराहाले दुई लाख रुपैयाँ धरौटीमा रिहा गरेको थियो ।