पोखरामा जारी १९औँ संस्करणको आहारारा गोल्डकप फुटबल प्रतियोगिताको अन्तिम चारमा संकटा क्लबले आफ्नो स्थान सुरक्षित गरेको छ भने मनाङ मर्स्याङ्दी क्लब बाहिरिएको छ । सोमबार भएको प्रतियोगिताको तेस्रो क्वार्टरफाइनलको खेलमा संकटाले गत वर्षको विजेता मनाङलाई १–० गोलले पराजित गर्दै अन्तिम चारणमा आफ्नो स्थान सुरक्षित गरेको हो ।
खेलको ४४औँ मिनेटमा संकटाका अफ्रिकन खेलाडी फोफोनाले गरेको गोल निर्णयक बन्यो । जितसँगै संकटाले फाइनल प्रवेशका लागि २५ चैतमा हुने समेमिफाइनल खेलमा शसस्त्र प्रहरीको नेपाल एफिएफ क्लबसँग भिड्नेछ ।
खेलमा सुरुदेखि नै दुवै टोलीले गोलका लागि केही अवसरहरू सिर्जना गरे पनि सो अवसर सदुपयोग गर्न सकेनन् । खेलको अन्तिमसम्म मनाङ गोल गर्ने प्रयासमा रहे पनि असफल भएपछि प्रतियोगिताबाट बाहिरिएको थियो ।
हिमश्री फुड्स प्रालिको उत्पादन आहा तथा रारा तयारी चाउचाउको मुख्य प्रायोजनमा भएको प्रतियोगितामा ए डिभिजनका क्लबहरू, मोफसल र आयोजक सहारा गरी आठ टोलीको सहभागिता रहेको छ । २८ चैतसम्म सञ्चालन हुने प्रतियोगिताको विजेता टोलीले १० लाख एक हजार र उपविजेता टोलीले ५ लाख १ हजार रुपैयाँ पुरस्कार पाउनेछन् ।