- वि.सं २o८१ बैशाख २० बिहीबार
रामेछापमा विगतको वर्षमा भन्दा यस वर्ष हिउँदमा लगाइने तोरी उत्पादनमा गिरावट आएको छ । रामेछापमा हिउँदको समयमा वर्षात नभएपछि तोरी उत्पादनमा गिरावट आएको हो ।
जिल्लाको रामेछाप नगरपालिका, सुनापति गाउँपालिका, दोरम्बा गाउँपालिका, लिखुतामाकोसी गाउँपालिका, मन्थली नगरपालिका, खाँडादेवी गाउँपालिकामा किसानहरूले विशेषगरी तोरी खेती गर्दै आएका छन् ।
किसानले बारी तथा खेतमा लगाएको तोरीबाट तेल पेलेर घरमा उपभोग गर्दै आएको भए तापनि यस वर्ष भने उत्पादनमा गिरावट आएसँगै सबै किसानहरू निराश बन्न पुगेको रामेछाप नगरपालिका– ७ सुकाजोरका किसान रूपा कार्कीले जानकारी दिइन् ।
गएको वर्ष हिउँदमा पनि समयमा पानी परेकाले तोरी उत्पादन राम्रो भएको थियो । यस वर्ष हिउँदमा पानी नै परेन । पाखो बारी तथा पाखे खेतमा लगाएको तोरी बालीमा सिँचाइ गर्ने पानी नभएकै कारण पानी लगाउन सकिएन् ।
पानी नभएकै कारण यस वर्षको तोरीको बाेटमा दाना नै लागेन । पाखो बारीमा त पानी अभाव भएकै कारण कतिपय किसानको तोरी बारीमा नै सुकेको रामेछाप नगरपालिकाका कृषि प्राविधिक कृष्ण भुजेलले जानकारी दिए ।
