डोटीमा अटोरिक्सा दुर्घटना हुँदा एकजनाको मृत्यु भएको छ भने चारजना घाइते भएका छन् । जिल्लाको शिखर नगरपालिका- ८ तिलतालीनजिक अटो दुर्घटना भएको हो । सातजना बोकेर शिखर नगरपालिका- १० बानेडुग्रीसैनबाट दिपायल आउँदै गरेको अटो मंगलबार राति ८ बजेतिर दुर्घटना भएको हो ।
दुर्घटनामा परी शिखर नगरपालिका- ३ का ५३ वर्षीय पदम जोराको घटनास्थलमै मृत्यु भएको जिल्ला प्रहरी कार्यालय दिपायलले जानकारी दिएको छ ।
घाइते हुनेमा शिखर नगरपालिका- ३ का १८ वर्षीय अर्जुन पार्की, सोही वडाका अटोचालक ४१ वर्षीय दीपक जोरा, ४० वर्षीय जित जोरा र सोही ठाउँका १७ वर्षीय नरेश पार्की रहेको प्रहरीले जनाएको छ ।
घाइते चारजनामध्ये दुई जनालाई जिल्लामा उपचार हुन नसकेपछि अन्यत्र रिफर गरिएको छ भने दुईजनाको दिपायलस्थित शैलेश्वरी अस्पतालमा उपचार भइरहेको छ । अटोमा सवार दुईजना भने सकुशल छन् ।