डा. केसीको जीवन रक्षार्थ प्रतिनिधिसभा बैठक अवरुद्ध पारेकाे बालकृष्ण खाँडकाे स्पष्टिकरण
प्रमुख प्रतिपक्ष दल कांग्रेसले आमरन अनसनरत डा. गोविन्द केसीको जीवन रक्षाका लागि सरकार संवेदनशील नभएकाले प्रतिनिधिसभा बैठक बिहीबार पनि अवरुद्ध पार्नु परेको स्पष्टिकरण दिएको छ ।
कांग्रेसका प्रतिनिधिसभाका प्रमुख सचेतक बालकृष्ण खाँडले डा. केसीसँग गरिएको सहमति विपरित सरकार र सभामुखले प्रतिनिधिसभाबाट जबरजस्ती राष्ट्रिय चिकित्सा शिक्षा विधेयक पारित गरेपछि संसद बैठक अवरुद्ध पारेको स्पष्टिकरण दिएका छन् । उनले सभामुख कृष्णबहादुर महरा सत्तापक्ष र प्रमुख प्रतिपक्षबीच संवादको माध्याम बन्नु पर्नेमा सत्तापक्षीय बनेकाले उनको आलोचना गर्नु परेको बताए । बिहीबार प्रतिनिधिसभा बैठक अवरुद्ध पारेपछि संचारकर्मीमाझ कुरा गर्दै प्रमुख सचेतक खाँडले कांग्रेसले जनसरोकारका विभिन्न विषयलाई लिएर सरकारविरुद्ध आन्दोलन सुरु गरेको बताए ।
कांग्रेसले डा. केसीको माग सम्बोधन नगरेसम्म संसद बैठक चल्न नदिने अडान राख्दै आएको छ ।