- वि.सं २०८१ बैशाख १५ शनिबार
राष्ट्रिय जनता पार्टी र समाजवादी पार्टीले संयुक्त रुपमा नेपालको संविधान (दोस्रो संशोधन) विधेयक संघीय संसद् सचिवालयमा दर्ता गरेका छन् ।
राजपाका लक्ष्मणलाल कर्ण र समाजवादीका राजेन्द्रप्रसाद श्रेष्ठले गैरसरकारी विधेयक दर्ता गराएका हुन् । राजपा र समाजवादी पार्टीले एकता घोषणा गरेर जनता समाजवादी पार्टी गठन गरेपनि कानुनी मान्यता पाइनसकेकाले दुई दलका रूपमा विधेयक दर्ता भएको हो ।
संसदमा बिरलै आउने यस्ता गैरसरकारी बिधेयक अहिले चलिरहेको संसदको छैटौँ अधिबेशनसम्म आइपुग्दा दुईवटा मात्रै प्रस्तुत भएको छ । यसअघि शेरबहादुर तामाङले गत १९ फागुनमा गाँजा खेती सम्बन्धि गैरसरकारी बिधेयक दर्ता गराएका थिए ।
२३ बुँदामा संशोधन प्रस्ताव दर्ता गराएको श्रेष्ठले जानकारी दिए । संशोधन प्रस्तावमा नागरिकता, भाषा, समानुपातिक समावेशीको व्यवस्था, प्रदेशहरूको सीमांकन हेरफेरका लागि समिति गठनलगायतका विषय समावेश छन् ।
यसअघि सरकारले लिम्पियाधुरा, कालापानी र लिपुलेक समेटेर बनाएको नक्साअनुसार निसान छाप परिमार्जन गर्न संविधान संशोधन विधेयक आइतबार संसदमा पेस गरेको थियो । कानुन, न्याय तथा संसदीय मामिलामन्त्री डा. शिवमाया तुम्बाहाङ्फेले आइतबारको प्रतिनिधिसभा बैठकमा ‘नेपालको संविधान (दोस्रो संशोधन) विधेयक, २०७७’ पेस गरेकी हुन् ।
