सुर्खेतमा चितुवाको छालासहित एक पक्राउ
प्रहरीले दुई वटा चितुवाको छालासहित एक जनालाई पक्राउ गरेको छ । प्रदेश नम्बर, ५ का प्रहरी अपराध अनुसन्धान समुहले कालिकोट रास्कोट, ४ का टंकप्रसाद उपाध्यायलाई वीरेन्द्रनगरको होटलबाट पक्राउ गरेको हो ।
चितुवाको छाला बेच्न लागेको विशेष सुराकीको आधारमा प्रहरीले उपाध्यायलाई पक्राउ गरेको प्रदेश प्रहरी अपराध अनुसन्धान समूहका प्रहरी निरीक्षक बोदराज रेग्मीले बताए । चितुवाको छाला बिक्री गर्न उपाध्याय हिँडेको थाहा पाएपछि प्रहरी आफै ग्राहक बनेर उनको सम्पर्कसम्म पुगेको थियो ।
‘प्रहरीलाई प्राप्त सूचनालाई हामीले गम्भीर रुपमा लियौँ, त्यसका लागि आवश्यक योजनासहित उपाध्यायको सम्पर्कसम्म पुगेका हौँ,’ रेग्मीले भने । फोन सम्पर्कका आधारमा प्रहरी उनले दिएको ठेगानासम्म पुगेको थियो । केही समय आफुसँग भएको छाला देखाउन नमानेका उनले ग्राहक बनेर आएका प्रहरीले मागेको मूल्य दिने बताएपछि छाला देखाएका थिए ।
छाला फेला पारेपछि प्रहरीले उपाध्यायलाई पक्राउ गरेको छ । उनलाई नियन्त्रणमा लिएर थप अनुसन्धान भइरहेको प्रहरीले जनाएको छ ।