जिल्ला प्रशासन कार्यालय चितवनले निषेधाज्ञा लगाएको छ । प्रशासनले ९ भदौ सोमबार बिहान ६ बजेदेखि अर्को सूचना नआएसम्मका लागि निषेधाज्ञा लगाएको हो ।
हिरासतमा रहेका न्युज २४ का कार्यक्रम प्रस्तोता रवि लामिछाने लगायतको रिहाइको माग गर्दै प्रदर्शनमा उत्रेका प्रदर्शनकारीहरुबाट हुलदुङ्गा र अशान्ति हुन सक्नेभएकाले निषेधाज्ञा लगाएको प्रमुख जिल्ला अधिकार जीतेन्द्र बस्नेतद्वारा हस्ताक्षरित सूचनामा भनिएकाे छ । आइतबार साँझ सूचना जारी गर्दै एक ठाउँमा पाँच भन्दा बढी मानिस जम्मा हुन नपाउनेगरी आदेश जारी गरेको हो ।
पूर्वमा वाइपास सडकतर्फको आन्तरिक राजस्व कार्यालयको चोकदेखि घरेलु कार्यालयको चोकसम्म, पश्चिममा पूर्वपश्चिम लोकमार्गको समगण्डकी अस्पताल चोकदेखि चौविस कोठी चोकसम्म निषेधाज्ञा जारी गरिएको हो ।
त्यसै गरी उत्तरमा वाइपास सडकतर्फको आन्तरिक राजस्व कार्यालयको चोकदेखि भरतपुर अस्पताल पुरानो मेडिकल कलेज जाने चोक नारायणी मा.वि.चोक, कृषि ज्ञान केन्द्र हुँदै पूर्व पश्चिम लोकमार्गको चौविसकोठी चोकसम्म र दक्षिणमा वाइपास सडकतर्फको घरेलु कार्यालयको चोकदेखि दूरसञ्चार चोक हुँदै पूर्वपश्चिम लोकमार्गको समगण्डकी अस्पताल चोकसम्म निशेधाज्ञा जारी गरिएको हो ।