- वि.सं २o८३ श्रावण २९ शुक्रबार
नेपाली कांग्रेसका निवर्तमान सभापति शेरबहादुर देउवाले पार्टीभित्र देखिएका असहमति र विवादलाई एकतामा रूपान्तरण गर्नुपर्ने बताएका छन् । उनले मुलुकको वर्तमान राजनीतिक अवस्था संवेदनशील रहेको भन्दै कांग्रेसका नेता तथा कार्यकर्तालाई राष्ट्रिय हितका विषयमा जिम्मेवार भएर भूमिका निर्वाह गर्न आग्रह गरेका छन् ।
शुक्रबार काठमाडौंमा आयोजित कांग्रेस इतरपक्षको राष्ट्रिय भेलालाई सम्बोधन गर्दै देउवाले समाजमा देखिएको निराशालाई आशामा बदल्ने जिम्मेवारी कांग्रेसको काँधमा रहेको बताए ।
उनले लोकतन्त्र र राष्ट्रिय हितको संरक्षणका लागि कांग्रेसले ऐतिहासिक जिम्मेवारीअनुसार भूमिका खेल्नुपर्ने धारणा राखे ।
‘अहिले मुलुकको राजनीतिक अवस्था अत्यन्तै संवेदनशील देखिएको छ । यस्तो अवस्थामा नेपाली कांग्रेसका सम्पूर्ण साथीहरूले सजग भएर राष्ट्रिय अहितका काम रोक्न र सचेत गराउन भूमिका खेल्नुपर्छ,’ देउवाले भने ।
देउवाले कांग्रेसभित्रका मतभेदलाई बृहत् एकतामा बदल्नुपर्ने आवश्यकता औँल्याउँदै पार्टीलाई थप सुदृढ बनाएर अघि बढ्नुपर्ने बताए । उनले समाजमा रहेको निराशालाई आशामा बदल्न कांग्रेसले जनतामुखी भूमिका निर्वाह गर्नुपर्ने उल्लेख गरे ।
