सुडानमा पहिरोले सिंगै गाउँ पुरियो, हजारभन्दा बढीको मृत्यु भएको आशंका

सुडानको पश्चिमी डार्फर क्षेत्रमा पहिरोले पूरै गाउँ पुरिँदा करिब एक हजार मानिसको मृत्यु भएको सो क्षेत्र नियन्त्रण गर्ने विद्रोही समूहले जनाएको छ । समाचार एजेन्सीहरूका अनुसार सुडान लिबरेसन मुभमेन्ट–आर्मी (एसएलएम–ए)ले सोमबार राति एक विज्ञप्ति जारी गर्दै डार्फरको मारा पर्वत क्षेत्रमा गएको पहिरोले सिंगै गाउँ पुरिएको हो । सो क्षेत्रमा कैयौँ दिनको भारी वर्षापछि आइतबार पहिरो गएको थियो । 

पहिरोले तारसिन नामक गाउँ पूरै पुरिएको हो । प्रारम्भिक सूचनाका आधारमा गाउँमा बस्ने बासिन्दाको मृत्यु भएको अनुमान गरिएको छ । ‘उक्त गाउँमा करिब एक हजारभन्दा बढी व्यक्ति बस्थे, जसमध्ये एकजना मात्र बाँचेका छन्,’ समूहद्वारा जारी विज्ञप्तिमा भनिएको छ । ‘एसएलएम–ए’ले पीडितहरूको शव निकाल्न संयुक्त राष्ट्र संघलगायत अन्तर्राष्ट्रिय सहायता एजेन्सीसँग अपिल पनि गरेको छ । 

खार्तुमकेन्द्रित सत्तारुढ ‘सार्वभौम परिषद्’ले पनि माराह पर्वतको पहिरोमा ‘सयौँ निर्दोष मानिसको मृत्यु’ भएको भन्दै शोक व्यक्त गरेको छ । प्रभावित क्षेत्र सडकसँग नजोडिएकाले सवारी साधन पुग्न र उद्धारमा कठिनाई  भएको बताइएको छ । देशमा चलिरहेको गृहयुद्धबाट बच्न मानिसहरू यस पहाडी क्षेत्रमा आश्रय खोज्दै गएका थिए ।

उत्तरी डार्फर सुडानको सरकारी सेना र अर्धसैनिक ‘र्‍यापिड सपोर्ट फोर्स’ (आरएसएफ) बिचको झडपबाट भागेका मानिसले मुख्य आश्रयका लागि मारा पर्वत क्षेत्र रोज्ने गरेका छन् । सुडानको जारी गृहयुद्ध अहिले तेस्रो वर्षमा पनि रोकिने छाँटकाँट छैन । गृहयुद्धकै कारण देश विश्वकै सबैभन्दा खराब मानवीय संकटमा परेको वेला पछिल्लो विपत्ति घटेको हो ।