- वि.सं २o८२ भदौ १४ शनिबार
रुपन्देही नापी कार्यालयका निमित्त प्रमुख सुग्रीव यादव सरकारी सेवक भए पनि जीवनशैली, पहुँच र सम्पत्तिले उनी सामान्य कर्मचारीभन्दा फरक देखिन्थे । उपसचिव कार्यालय प्रमुख हुने कार्यालयमा पहुँचका आधारमा उनी लामो समयदेखि निमित्त प्रमुख भएर काम गरिरहेका थिए । जब एक अनुसन्धानमा उनको असली नियत बाहिर आयो, तब जीवनशैली, पहुँच र सम्पत्तिको राज पनि खुल्यो ।
अख्तियार दुरुपयोग अनुसन्धान आयोगको अनुसन्धानमा नापी अधिकृत यादवसँग करिब ६ करोड रुपैयाँबराबरको अकुत सम्पत्ति भेटिएको छ । नापी कार्यालय रुपन्देहीका निमित्त प्रमुख यादवले सधैँ महत्वपूर्ण कार्यालयमा बसेर ठुलो मात्रामा अकुत सम्पत्ति जोडेका हुन् । अख्तियारले शुक्रबार उनीविरुद्ध विशेष अदालतमा मुद्दा दायर गरेको हो ।
अनुसन्धानमा उनले सानो उमेरमै छोराहरूलाई अंशबन्डा गरेर सम्पत्ति लुकाएर तथा बनावटी ऋणपत्रका कागज बनाएर उनले करोडौँको घरजग्गा जोडेका थिए । करोडौँको घरजग्गा जम्मा गर्ने शैलीले अख्तियारको छानबिनमा परेका उनीमाथि अकुत सम्पत्ति जोडेको मुद्दा दर्ता भएको हो । भ्रष्टाचारको सम्पत्ति जोगाउन उनले सम्पत्ति शुद्धीकरण गरेको देखिएपछि आयोगले सम्पत्ति शुद्धीकरणको कसुरमा छुट्टै अनुसन्धान गरिरहेको छ । रुपन्देहीमा नापी कार्यालय घुस लेनदेनको अखडा नै मानिन्छ ।
तीन दर्जनभन्दा धेरै घरजग्गा जोडेका यादवसँग सरकारी मूल्यांकनअनुसार १४ करोड ८३ लाख ५७ हजार रुपैयाँबराबरको सम्पत्ति रहेकोमा पाँच करोड ७९ लाख ६२ हजार रुपैयाँबराबरको सम्पत्तिको स्रोत नखुलेपछि मुद्दा दायर गरिएको अख्तियारका सहायक प्रवक्ता गणेशबहादुर अधिकारीले बताए । उनले अकुत सम्पत्ति लुकाउँदा सानो उमेरमै दुई छोरालाई अंशबन्डा गराएको तथा लेनदेनका नक्कली कागजसमेत बनाएको आयोगले जनाएको छ । आयोगले श्रीमती गायत्री तथा छोराहरू सुधान्सु र शुभमलाई पनि सम्पत्ति जफतको प्रयोजनका लागि प्रतिवादी बनाएको छ ।
छोराहरूसँग पनि आयोगले सोधपुछ गर्दा आफूहरू बुबाआमासँगै बस्दै आएको र अंशबन्डाबारे जानकारी नभएको बताएका छन् । जसबाट पनि उनले गैरकानुनी सम्पत्ति लुकाउनकै लागि उनले छोराहरूका नाममा जग्गा किन्दै आएको पुष्टि भएको आयोगले जनाएको छ ।
आफ्नौ गैरकानुनी सम्पत्ति लुकाउन उनले विभिन्न व्यक्तिसँग करोडौँ ऋण लिएको भनेर सिद्धार्थ नगरपालिका– ४ मा कपाली कागज गरेका थिए । सुग्रीव यादवलाई ऋण दिएका भनिएका व्यक्तिहरू डिलकुमारी कार्की, शिवनारायण यादव, चन्द्रमणि अधिकारी र खेम खड्काको नाममा यस्तो कागज गरिएको थियो ।
कागज बनाइदिने वडाध्यक्ष मुक्तिनाथ यादवमाथि समेत आयोगले सम्पत्ति शुद्धीकरणको कसुरमा अनुसन्धान गर्ने भएको छ । त्यस्तै, यादवसँग पैसा लिएर फिर्ता नगर्ने मीना सापकोटा, गोपाल पाण्डे र लोकबहादुर थारूलाई समेत आयोगले सम्पत्ति शुद्धीकरणको कसुरमा अनुसन्धानका लागि तान्ने भएको छ ।
०५३ मा सरकारी सेवामा प्रवेश गरेका उनी लामो समयदेखि रुपन्देहीमा बस्दै आएका थिए । स्रोतका अनुसार भूमि व्यवस्था मन्त्रालयमै प्रभाव जमाएर उनी लामो समयदेखि निमित्त कार्यालय प्रमुख भएर बस्दै आएका थिए । सोही क्रममा उनले अकुत सम्पत्ति आर्जन गरेका हुन् । आयोगका अनुसार ०५८ यता उनले काठमाडौंलगायत विभिन्न ठाउँमा ४१ वटा घरजग्गा खरिद गरेका छन् । मालपोत कार्यालयमा उल्लेख लागतअनुसार ती घरजग्गामा उनले पाँच करोड आठ लाख ४९ हजार लगानी गरेका छन् । काठमाडौंको कुमारीगाल, कलंकी, नयाँ नैकापसहितका ठाउँमा दुईवटा घर र २० ठाउँमा जग्गा खरिद गरेका छन् । धेरैजसो जग्गा नवलपरासी र कपिलवस्तुमा खरिद गरेका छन् । ती सबै जग्गा उनले श्रीमती र छोराको नाममा राखेका छन् ।
सम्पत्ति विवरणमा समेत उनले आफ्नो सम्पत्ति लुकाउँदै आएको आयोगले विशेष अदालतमा दायर गरेको आरोपपत्रमा उल्लेख छ । उनले अकुत सम्पत्ति देवी मनकामना बालुवा संशोधन प्रालि, वाइजिएन रियल इस्टेट कम्पनी, पाल्पा इन्जिनियरिङ प्रालिमा पनि लगानी गरिएको आयोगको छानबिनमा भेटिएको छ । सुनचाँदीमा उनले २० लाख २४ हजार रुपैयाँ तथा सवारीसाधन खरिदमा १९ लाख २० खर्च गरेका थिए ।
