- वि.सं २o८२ भदौ १४ शनिबार
धनकुटाको सात स्थानीय तहमध्ये स्थानीय तह संस्थागत क्षमता स्वमूल्यांकन -LISA_मा चौबिसे गाउँपालिका प्रथम भएको छ। संघीय मामिला तथा सामान्य प्रशासन मन्त्रालय सिंहदरबार काठमाडौंले आर्थिक वर्ष ०८०/८१ को स्थानीय तह संस्थागत क्षमता स्वमूल्यांकन-LISA_मा चौबिसे गाउँपालिका धनकुटा ७५.७५ अंक प्राप्त गरी प्रथम हुन सफल भएको हो। गुणस्तर परीक्षणमा सहिदभूमि गाउँपालिका धनकुटा ७५ अंक प्राप्त गरी दोस्रो भएको छ भने ७४.५० अंकका साथ पाख्रिवास नगरपालिका धनकुटा तेस्रो भएको छ।
त्यस्तै, धनकुटा नगरपालिका धनकुटाले ७३.२५ अंक पाएर चौथो हुँदा साँगुरीगढी गाउँपालिका धनकुटाले ७१.५० अंक प्राप्त गरेको छ। यता महालक्ष्मी नगरपालिका धनकुटाले ६८.७५ अंक पाएको छ भने छथरजोरपाटी गाउँपालिका धनकुटाको अंक उल्लेख गरिएको छैन। चौबिसे गाउँपालिका कार्यसम्पादन मूल्यांकमा पहिलो भएपछि गाउँपालिकाका अध्यक्ष राजकुमार लिम्बूले खुसी व्यक्त गरे।
उनले भने, ‘कार्यसम्पादन मूल्यांकनमा चौबिसे गाउँपालिका जिल्ला प्रथम हुनुमा सम्पूर्ण जनप्रतिनिधि, वडाध्यक्षहरु र कर्मचारीहरूको जनमुखी कामका कारण यो परिणामप्राप्त भएको हो। आगामी दिनमा जनताको आशा र अपेक्षालाई शिरोधार्य गर्दै अझ राम्ररी अगाडि बढ्नेछौँ।’ अघिल्लो वर्ष तेस्रो भएको चौबिसे गाउँपालिका यस वर्ष प्रथम हुन सफल भएको थियो।
गाउँपालिका तथा नगरपालिकाको कार्यप्रक्रिया र उपलब्धिको लेखाजोखा गरी शासकीय पद्धति र विकास व्यवस्थापनमा गर्नुपर्ने सुधारका क्षेत्रहरू पहिचान गर्ने, आवधिक समीक्षाको आधार प्राप्त गर्ने र स्थानीय सरकारबिच स्वस्थ प्रतिस्पर्धाको भावना जागृत गराउने उद्देश्यले हरेक वर्ष स्थानीय तह संस्थागत क्षमता स्वमूल्यांकन हुने गर्दछ।
