पर्यटकीयस्थलको प्रवर्द्धन गर्न माओवादी केन्द्रको जनश्रमदान अभियान

 नेपाल कम्युनिष्ट पार्टी (माओवादी केन्द्र) खोटेहाङ गाउँपालिका कार्यसमितिले जनश्रमदानमार्फत पर्यटकीयस्थलहरुको प्रवद्र्धन सुरु गरेको छ। स्थानीय जनता र माओवादी केन्द्रका नेता तथा कार्यकर्ताबीचको सम्बन्ध सुमधुर बनाउँदै गाउँपालिकाभित्र पर्ने पर्यटकीयस्थलहरुको प्रवद्र्धन गर्ने उद्देश्यले माओवादी केन्द्र गाउँपालिका कार्यसमितिले जनश्रमदान अभियान सुरु गरेको हो । 

जनश्रमदान अभियान अन्तरगत वडा नं. २ वाप्लुखाको कपासेभञ्ज्याङमा निर्माणाधीन राष्ट्रिय विभूति पार्क (उद्यान) र रोक्सिमभञ्ज्याङको सोलढुङ्गा, सुम्निमा–पारुहाङ पार्क र सानो हलेसी गुफा आसपासका क्षेत्रको सरसफाइ तथा वृक्षारोपण सम्पन्न गरिएको माओवादी केन्द्र खोटेहाङ गाउँपालिका कार्यसमितिका अध्यक्ष दिपेन थुलुङले जानकारी दिए। ‘हाम्रो गाउँपालिकाभित्र प्राकृतिकरुपमै बनेका पर्यटकीयस्थलहरु धेरै छन् । तिनीहरुको प्रवद्र्धन गर्न सकेमा स्थानीय सरकारको आम्दानीको स्रोतसमेत वृद्धि गर्न सकिन्छ’, उनले भने, ‘पछिल्लो समय सानातिना कामका लागिसमेत राज्यको मुख ताक्ने प्रवृत्तिको विकास भइरहेको छ । हामीमा श्रम गर्ने बानी हटिसकेको छ । आफ्नो क्षेत्रको सानातिना काम आफै गर्न सकिन्छ भन्ने सन्देश प्रवाह गर्दै पर्यटकीयस्थलहरुको प्रवर्द्धन गर्न जनश्रमदान अभियान थालेका हौँ ।’

माओवादी केन्द्र गाउँपालिका कार्यसमितिले सुरु गरेको जनश्रमदान अभियानमा स्थानीयवासीसमेत स्वतः स्फूर्तरुपमा ८० देखि एक सय  जनासम्म सहभागी हुने गरेको अध्यक्ष थुलुङले बताएका छन् । जनश्रमदान अभियानका क्रममा पर्यटकीय तथा सार्वजनिकस्थलमा वृक्षारोपण, भत्किएका, बिग्रिएका र झाडीले छोपेका सडक मर्मत, गोरेटो बाटोहरु मर्मत लगायतका काम गरिने जनाइएको छ । 

यही भदौ–५ गतेबाट औपचारिक रुपमा सुरु गरिएको अभियान अन्तरगत रोक्सिमभञ्ज्याङको सोलढुङ्गा, सुम्निमा–पारुहाङ पार्क (उद्यान) र सानो हलेसी गुफा आसपास आन्तरिक तथा बाह्य पर्यटकले जथाभावी फालेका फोहर संकलन गरेर व्यवस्थापन गर्नुका साथै विभिन्न प्रजातिका फलफूलको बिरुवा रोखिएको माओवादी केन्द्रले जनाएको छ । 

जनश्रमदान अभियानका क्रममा स्थानीय सामुदायिक वनबाट ल्याइएको नेपालको राष्ट्रिय फूल लालीगुराँसका एक हजार तथा सव–डिभिजन वन कार्यालय खोटाङबजारले उपलब्ध गराएको धुपी र सल्लाका बिरुवासमेत रोपिएको जनाइएको छ । जनश्रमदानमार्फत पर्यटकीयस्थलहरुको प्रवर्द्धन गर्ने अभियान गाउँपालिकाभित्रका सबै वडामा सञ्चालन गरिने आयोजक माओवादी केन्द्रले जनाएको छ । 

अभियान अन्तरगत वडा नं. २ वाप्लुखास्थित कपासेभञ्ज्याङमा निर्माणाधीन राष्ट्रिय विभूति पार्क तथा चिया बगानको सरसफाइ एवम् आसपासका क्षेत्रमा वृक्षारोपण गरिएको माओवादी केन्द्रका अध्यक्ष थुलुङले जानकारी दिएका छन् । करिब तीन हजार रोपनी क्षेत्रफल ओगटेको सार्वजनिक जग्गामा निर्माणाधीन पार्क आसपासका क्षेत्रमा गुराँस, धुपी, सल्ला तथा विभिन्न प्रजातिका मौषमी फूलका बिरुवा रोपिएको आयोजक माओवादी केन्द्रले जनाएको छ ।