शिक्षकले पाएनन् ६ महिनादेखि तलब

कालिकोटको खाँडाचक्र नगरपालिकाका शिक्षक कर्मचारीहरूले ६ महिनादेखि तलब पाएका छैनन्। नगरपालिकाभित्रका ३९ सामुदायिक विद्यालयका शिक्षक कर्मचारीले तलब नपाएका हुन्। 

चुलिमालिका मावि घोडेनाका प्रधानाध्यापक दीपबहादुर शाहीले ६ महिनादेखि तलब सुविधा नपाएको बताए। 'तलब नपाएका कारणले बाध्य भएर ज्ञापनपत्र बुझाएका छौँ,' उनले भने, 'असोजदेखि तलबभत्ताका नाममा एक पैसा पाउन सकेका छैनौँ।'

तलब नपाउँदा आफ्नो दैनिक जनजीवन नै प्रभावित हुने गरेको शिक्षक पवित्राकुमारी शाहीको जानकारी दिए। 'संसारमा काम गरेको घण्टाको हिसाबले तलब पाउँछन्,' उनले भने, 'हामीले भने काम गरेको तलब पाउन पनि छ महिना कुर्नुपर्छ।' शिक्षकहरूको हकमा भने पहिला–पहिला चार/चार महिनामा र अचेल तीन/तीन महिनामा तलब दिने गरिएकामा पनि नगरपालिकाले दोस्रो त्रैमासिक र तेस्रो त्रैमासिकको तलबभत्ता नदिएको शिक्षकहरूको भनाइ छ। 

नगरपालिकामा पहिल्यैदेखि प्रमुख प्रशासकीय अधिकृत नहुँदा र नयाँ लेखापाल तालिममा गएका कारण नगरपालिकाको आर्थिक गतिविधि ठप्प रहेको नगर प्रमुख कमलबहादुर शाहीले बताए। उनले शिक्षकको हकमा आफू पनि चिन्तित रहेको जनाउँदै शिक्षकको तलबभत्ता छिटो हाल्न कर्मचारीलाई निर्देशन दिइसकेको बताए।

शिक्षकहरूको दोस्रो त्रैमासिक र तेस्रो त्रैमासिकको निकासा दिनका लागि आफूले लेखा शाखामा फाइल पुर्‍याएको, तर भुक्तानी नगरेको शिक्षा शाखा प्रमुख बलराज शाहीले बताए।