एन्फा महासचिव राईलाई अदालतमा उपस्थित हुन म्याद तामेल

अखिल नेपाल फुटबल संघ (एन्फा) महासचिव किरण राईलाई काठमाडौं जिल्ला अदालतले ३६ दिनभित्र प्रत्युत्तरसहित आफैउले वा वारेसलाई अदालतमा उपस्थित हुन म्याद तामेल गरेको छ । 

एन्फा पूर्वअध्यक्ष गणेश थापाले वर्तमान महासचिव राईलाई कानुनी कारबाही गर्न नेपाल प्रहरीको साइबर ब्युरोमा उजुरी गर्नुका साथै काठमाडौं जिल्ला अदालतमा गाली बेइज्जतीको मुद्दा दायर गरेको थिएँ। 

काठमाडौं जिल्ला अदालतले प्रक्रियाअनुसार एन्फाको मुख्यालय सातदोबाटोमा रहेकोले कार्यक्षेत्र पर्ने ललितपुर जिल्ला अदालतलाई पठाएको पत्रअनुसार ललितपुर जिल्ला अदालतले १८ चैतमा तामेल गरेको हो। 

अदालतका कर्मचारीले एन्फा मुख्यालयमा पुगेर एन्फाका कर्मचारी सन्तराम राईलाई म्याद बुझेको पत्रमा हस्ताक्षर गराएका थिए। अब म्याद तामेल भएको मितिले राई ३६ दिनभित्र स्वयं वा वारेसमार्फत प्रतिउत्तरसहित काठमाडौं जिल्ला अदालतमा उपस्थित हुनुपर्नेछ। 

यसअघि राईले एक अन्तरवार्तामा अत्यन्तै आधारहीन र झुटा आरोप लगाएर चरित्रहत्याको प्रयास गरेको थापाको आरोप छ। 

राईले थापालाई १७ करोड रुपैयाँ हिनामिना गरेको, सम्पत्ति शुद्धीकरणको छानबिनपछि आठ करोड रुपैयाँ एन्फाको खातामा जम्मा गरेको आरोप लगाएका थिए। ‘मैले झुटा र तथ्यहीन आरोप सच्याउन र आत्मालोचना गर्न अनुरोध गरेको थिएँ। तर, उहाँले आफ्नो भनाइ सच्याउने र आत्मालोचना गर्नेमा कुनै चासो नदेखाएपछि मैले बाध्य भएर कानुनी कारबाहीको प्रक्रिया अगाडि बढाएको हो,’ थापाले भने। 

थापाले कानुनी राज्यको हिमायती भएको नाताले आरोपअनुसार आठ करोड रुपैयाँ एन्फाको खातामा जम्मा गरेको विषयमा छानबिन गर्न र दोषी भए कानुनअनुसार कारबाही भोग्न तयार रहेको प्रतिबद्धता जाहेर गरेका छन्।