इयूले ट्रम्पको भन्सार महसुलको जवाफ अप्रिल अन्त्यसम्ममा दिन्छ : फ्रान्स

युरोपेली संघ (इयू)ले संयुक्त राज्य अमेरिकाद्वारा बुधबार घोषणा गरिने नयाँ भन्सार महसुलको जवाफ अप्रिल महिनाको अन्त्यभित्र दिने फ्रान्सेली सरकारकी प्रवक्ताले बताएकी छिन्।

‘त्यहाँ दुईवटा जवाफहरू हुनेछन्। पहिलो, अप्रिलको मध्यमा हुनेछ, त्यो स्टिल र आल्मोनियममा पहिले नै निर्णय गरिएको भन्सार महसुलको प्रतिक्रिया हो,’ मन्त्रिपरिषद्को बैठकपछि प्रवक्ता सोफी प्रिमासले भनिन्, ‘त्यसपछि क्षेत्र–क्षेत्र अनुसार विस्तृत अध्ययन हुनेछ र अप्रिलको अन्त्यअघि समन्वित, एकताबद्ध र बलियो तरिकाले युरोपेली निर्णय घोषणा गरिनेछ।’

फ्रान्सका राष्ट्रपति इमानुएल म्याक्रोनले बुधबार अपराह्न युरोपेली आयोगकी प्रमुख उर्सुला भन डेर लेयनसँग कुरा गर्ने प्रिमासको भनाइ छ। अमेरिकी राष्ट्रपति डोनाल्ड ट्रम्पले व्यापक ‘मुक्ति दिवस’ भन्सार महसुलहरू घोषणा गर्ने तयारी गरेका छन्।

‘जब व्यापार नीतिको कुरा आउँछ फ्रान्स युरोपेली संघको तर्फबाट बोल्दैन। हामी बोल्छौँ,’ आयोगका व्यापार प्रवक्ता ओलोफ गिलले ब्रसेल्समा पत्रकारहरूलाई भने।

भन डेर लेयन युरोपेली संघका नेताहरूसँग सम्पर्कमा रहेको उनका प्रवक्ताले पुष्टि गरेकी छिन्। ‘स्पष्ट रूपमा यस महत्त्वपूर्ण विषयमा हामीले विभिन्न नेताहरूको इनपुटसहित वास्तवमै एक समन्वित प्रतिक्रिया पाउन सकौँ भनेर अध्यक्ष युरोपेली संघभरका नेताहरूसँग सम्पर्कमा रहनुभएको छ,’ प्रवक्ता पाउला पिन्होले एक पत्रकार सम्मेलनमा भनिन्।