- वि.सं Invalid date format
उदयपुरका तीन स्थानबाट प्रहरीले झन्डै एक हजार किलोग्राम गाँजा बरामद गरेको छ। जिल्ला प्रहरी कार्यालयका सूचना अधिकारी डिएसपी केदारमान दोङका अनुसार ९४६.२७३ किलोग्राम बेवारिसे गाँजा बरामद भएको हो।
उनका अनुसार १६ चैत्रमा बेलका नगरपालिका–६ असारे मूर्ति खोलाको किनारमा रहेको वनमारा झाडीमा लुकाइछिपाई राखेको बेवारिसे अवस्थामा ८९१.४२३ किलोग्राम गाँजा फेला परेको हो। उक्त गाँजामा संलग्न व्यक्तिको खोजी कार्य भइरहेको दोङको भनाइ छ।
यसैगरी, १८ चैत्रमा कटारी नगरपालिका–४, खानेपानी ट्यांकी नजिकबाट ३५.८५० किलोग्राम गाँजासहित एकजनालाई प्रहरीले पक्राउ गरेको छ। विशेष सूचनाको आधारमा जिल्ला प्रहरी कार्यालयबाट खटिएको प्रहरी टोलीले उदयपुरको आहालेबाट कटारी बजारतर्फ जाँदै गरेको प्रदेश २–०१००१ ह ११२६ नम्बरको अटोरिक्सामा बोरामा पोको पारेर लैजाँदै गरेको अवस्थामा उक्त गाँजा बरामद गरेको हो। गाँजा फेला परेको अटोरिक्साचालक कटारी नगरपालिका– ५ का २९ वर्षीय प्रेमबहादुर श्रेष्ठ पक्राउ परेका छन्।
सोही दिन बेलका नगरपालिका–८ आरांगाबाट १५ किलोग्राम गाँजा फेला परेको डिएसपी दोङले जानकारी दिए। नम्बर नखुलेको मोटरसाइकलमा जेब्राझोलामा पोको पारी गाँजा ल्याउँदै गरेको भन्ने विशेष सूचनाको आधारमा जिल्ला प्रहरी कार्यालय उदयपुर र इलाका प्रहरी कार्यालय रामपुर ठोक्सिलाबाट खटिएको संयुक्त प्रहरी टोलीले गाँजा बरामद गरी संलग्न व्यक्तिहरूको खोजी कार्य जारी राखेको उनको भनाइ छ।
१० हजारभन्दा बढी लागुऔषध ट्याबलेटसहित ९ जना पक्राउ
यता गाईघाट र कटारीबाट नियन्त्रित लागुऔषध ट्याबलेटसहित नौजना पक्राउ परेका छन्। इलाका प्रहरी कार्यालय कटारी उदयपुरबाट खटिएको प्रहरी टोलीले कटारी नगरपालिका–४ कान्छी बजारबाट १० हजार ४६३ वटा नियन्त्रित लागुऔषध ट्याब्लेट र एक सय ग्राम गाँजासहित सातजनालाई पक्राउ गरेको छ।
पक्राउ परेकाहरूको साथबाट नगद दुई लाख ४७ हजार ७ सय २० रुपैयाँ, दुईवटा मोटरसाइकल र ६ वटा मोबाइल फोन बरामद भएको डिएसपी दोङले जानकारी दिए।
पक्राउ पर्नेमा कटारी नगरपालिका–७ का २९ वर्षीय हरिबहादुर तामाङ, वडा नम्बर ८ का १९ वर्षीय भक्तबहादुर तामाङ, वर्ष २५ का सोमकृष्ण राई, वडा नम्बर ४ का २३ वर्षीय अनमोल मगर, वर्ष २० की आरती राउत, वर्ष २३ का सरदकुमार सुनुवार र १९ वर्षीय विक्रम साशंकार रहेका छन्।
त्रियुगा नगरपालिका–१२ शनि मन्दिरनजिकबाट प्रतिबन्धित लागुऔषधसहित दुईजना पक्राउ परेका छन्। पक्राउ पर्नेमा त्रियुगा नगरपालिका–१२ का १९ वर्षीय रोहित झा र १८ वर्षीय विवेक विश्वकर्मा रहेका छन्। डिएसपी दोङका अनुसार विभिन्न प्रकारका नियन्त्रित लागुऔषध ट्याब्लेट ६० थान पक्राउ परेका छन्।
