- वि.सं २o८१ चैत २० बुधबार
नेपाल क्लियरिङ हाउस लिमिटेड (एनसिएचएल)ले रिटेल पेमेन्ट स्विच (आरपिएस)मार्फत हुने पाँच सय रुपैयाँसम्मको फन्ड ट्रान्सफरमा कुनै शुल्क नलाग्ने व्यवस्था गरेको छ।
कनेक्ट आइपिएसको वेब वा मोबाइल एप, बैंक वित्तीय संस्थाको मोबाइल बैंकिङमा रहेको कनेक्टआइपिएस फन्ड ट्रान्स्फर तथा कनेक्ट आइपिएसमार्फत मोबाइल वालेटमा गरिने क्यास इन–आउटलाई पूर्ण रूपमा निःशुल्क गरिएको एनसिएचएलले जनाएको छ।
१९ चैतबाट उक्त व्यवस्था कनेक्ट आइपिएसमा कार्यान्वयनमा आइसकेको छ भने बैंक वित्तीय संस्था र वालेटहरूले आफ्ना प्रणालीहरूमा आवश्यक व्यवस्था मिलाएपछि मोबाइल बैंकिङ तथा वालेटमा पनि क्रमिक रूपमा लागू हुने एनसिएचएलले जनाएको छ।
डिजिटल भुक्तानीलाई प्रवर्द्धन गर्नुका साथै सानो रकमका भुक्तानीहरू डिजिटल माध्यमबाट गर्न प्रोत्साहन गर्ने उद्देश्यका साथ एनसिएचएलले यस्तो व्यवस्था गरेको हो।
आरपिएसमार्फत हुने अन्य च्यानलहरू र कारोबारहरूमा भने कारोबार रकमको आधारमा हाल कायम रहेको रु. दुई र रु. आठ कारोबार शुल्कको व्यवस्था यथावत् रहनेछ। साथै उक्त कारोबार शुल्कमा कानुनबमोजिमको भ्याट थप हुने व्यवस्था छ।
थप जानकारीका लागि एनसिएचएल अथवा कनेक्ट आइपिएसको वेबसाइटमा हेर्न सकिन्छ।
