- वि.सं २o८१ चैत २० बुधबार
धनकुटाको चौबिसे गाउँपालिका– ४ सुरुंगीमा आगलागीबाट एक घर जलेर नष्ट भएको छ। आगलागीबाट स्थानीय फूलमाया फागोको घर जलेर पूर्ण रूपमा नष्ट भएको हो।
बारीमा जम्मा गरेको पातपतिंगर जलाउने क्रममा हावाले उडाएर घरमा आगो सल्किएको थियो। उक्त आगलागीबाट घरमा रहेको लत्ताकपडा, अन्नपात, काठपातसहित घरछेउको गाई गोठ पनि जलेर पूर्ण रूपमा नष्ट भएको चौबिसे गाउँपालिका– ४ का वडाध्यक्ष लोकेन्द्र थापामगरले बताए । आगलागीबाट करिब चार लाखबराबरको क्षति भएको प्रहरीको प्रारम्भिक अनुमान छ।
घर जलेर नष्ट भएपछि बिचल्लीमा परेको फागो परिवारलाई पुनर्स्थापित गर्न आवश्यक राहतका लागि पहल भइरहेको वडाध्यक्ष मगरले बताए । गर्मी सुरु सँगै पर्याप्त मात्रामा पानी पर्न नसकेपछि सुक्खा वातावरणका कारण धनकुटाका सामुदायिक वन तथा व्यक्तिको घरहरूमा आगलागी तथा डढेलो लाग्ने क्रममा दिन प्रतिदिन बढ्दै गएको छ।
