- वि.सं Invalid date format
सामाजिक सञ्जाल ह्वाट्सएपको प्रयोग गरी पाँच करोड भारतीय रुपैयाँ फिरौती रकम माग गरेको अभियोगमा कोहलपुर नगरपालिका– ५ डेरा गरी बस्ने सुर्खेत भेरीगंगा नगरपालिका– ७ काठेघारी घर भएका ४१ वर्षीय रामबहादुर बुढा क्षेत्रीलाई प्रहरीले पक्राउ गरेको छ ।
रामबहादुरले विभिन्न विदेशी नम्बरको ह्वाट्सएप खोली आफू लोरेन्स बिस्नोई र अनमोल बिस्नोई हो भनी म्यासेज गरी उक्त रकम माग गरेको र उक्त रकम नदिएमा जे पनि हुन सक्ने भनी धम्क्याउने गरेको भन्ने सूचनाको आधारमा इलाका प्रहरी कार्यालय कोहलपुरबाट खटिएको प्रहरीले उनलाई पक्राउ गरेको हो । पक्राउ परेका बुढा क्षेत्रीविरुद्ध आपराधिक लाभ मुद्दाका अनुसन्धान अघि बढाइएको इप्रका कोहलपुरका डिएसपी धर्मराज भण्डारीले बताए।
बाँकेका एक पूर्ववडाध्यक्ष तथा एमाले नेतालाई उनले धम्क्याएका हुन्। धम्क्याउन फ्रान्सको ह्वाट्सएप नम्बर प्रयोग गरेका थिए।
पक्राउ परेका रामबहादुर यसअघि पनि विभिन्न आपराधिक मुद्दामा पक्राउ परी छुटेका व्यक्ति हुन्। माओवादी नेता शक्ति बस्नेतलाई लक्षित गरी गोली प्रहार गरेको घटनामा उनी पाँच वर्ष जेल बसेर छुटेको प्रहरीले जनाएको छ ।
