समाचार

झापादेखि पोखरासम्मका बिद्यार्थी चिकित्सा शिक्षा अध्ययनका लागि जुम्लामा

कर्णाली स्वास्थ्य विज्ञान प्रतिष्ठानमा नयाँ शैक्षिक सत्र सुरु भएसँगै चिकित्सा शिक्षा अध्ययनका लागि विद्यार्थी जुम्ला पुगेका छन् । दाङका हुमबहादुर डाँगीले छोरी वर्षालाई बिएस्सी नर्सिङ पढाउनका लागि जुम्ला पुगेको बताए । रौतहटकी कृति यादव र झापाकी सृष्टि थापामगर एमबिबिएस पढ्न जुम्ला आउँदा निकै उत्साहित देखिन्थे । काठमाडौं वा पोखराको कोलाहलपूर्ण वातावरणभन्दा जुम्ला पढ्नका लागि निकै उत्कृष्ट वातावरण रहेको उनीहरू बताउँछन् । 

त्यस्तै, नवलपरासीका सागर विश्वकर्माले प्रतिष्ठानबाट डाक्टर बनेर विकट ठाउँमा सेवा गर्ने चाहना रहेको बताए । बिएस्सी नर्सिङ पढ्न आएकी लमजुङकी कोसिका रानाभाट खुसी देखिन्थिन् । पोखराकी झरना गुरुङले भनिन्, ‘पोखराजस्तो सुन्दर सहरबाट जुम्ला आउँदा कुनै न्यास्रो लागेन । यहाँको प्रकृति र साथीहरूको साथले नयाँ ऊर्जा दिने विश्वास छ ।’

जुम्लाका सुरज उपाध्यायले भने, ‘पहिला–पहिला हाम्रा दाजुभाइ पढ्न भनेर जिल्लाबाहिर जानुपर्ने बाध्यता थियो । तर, अहिले घरनजिकै बिपिएच पढ्न पाउने भए ।’ प्राध्यापक क्षितिज उपाध्यायका अनुसार एकजना शिक्षकले चारजना विद्यार्थीलाई दैनिक हेर्न सक्ने वातावरण छ । ‘पढाइ तपाईंहरूले सोचेअनुसारको हुनेछ,’ विद्यार्थीलाई अभिमुखीकरण दिन आयोजित कार्यक्रममा उनले बताए । 

प्रतिष्ठानले पछिल्लो समय पठनपाठनमा देशमै उत्कृष्टता हासिल गरिरहेको प्रतिष्ठानका रेक्टर डबलबहादुर धामीले बताए । ‘विकटतामा रहेको यो संस्थान अहिले देशभरका विद्यार्थीको रोजाइको केन्द्रविन्दु बनेको छ, ’ उनले भने ।

बिहीबार भएको कार्यक्रममा एमबिबिएस पढ्ने ४३, बिपिएचका १५, बी फार्मका १४, बिएस्सी नर्सिङका १७ र बिएनएसका १५ ले सहभागिता जनाएको स्कुल अफ पब्लिक हेल्थ बिपिएच चौथो वर्षका संयोजक उपप्राध्यापक ओपप्रकाश काफ्लेले बताए ।