- वि.सं २o८१ मङ्सिर २३ आइतबार
राष्ट्रिय बी बुद्धिचाल प्रतियोगिता शनिबार भएको खेलमा उदीयमान खेलाडी पुरुषोत्तम सिलवाल च्याम्पियन बनेका छन् । नौ चरणसम्म भएको प्रतिस्पर्धात्र्मकमा काठमाडौंका पुरुषोत्तमले सर्वाधिक ६.५ अंक जोडेर उपाधि जितेका हुन् । उनले ४ जित र ५ बराबर नतिजा निकाले । प्रतियोगितामा उनी मात्र अपराजित खेलाडी बनेका छन् । डाइरेक्ट इन्काउन्टर र मोस्ट विन नियम लागू भएअनुसार उनले बाजी मारेका हुन् ।
२५ औँ राष्ट्रिय प्रतियोगिताको छनोटका रूपमा आयोजित स्पर्धामा समान ६.५ अंक जोडेर दोलखाका आशिष फुँयाल दोस्रो स्थानमा रहे । प्रतियोगितामा रौतहटका एफएम रूपेश जैसवाल तेस्रो स्थानमा रहेका छन् ।
पाँच दिनसम्म चलेको प्रतियोगिताका चौथो देखि नवौं स्थानसम्मका खेलाडीले समान ६ अंक जोडेका छन् । उनीहरू राष्ट्रिय खेलमा छनोट भएका छन् । भक्तपुरका विनय थापा, ललितपुरका सुरोज महर्जन, काठमाडौंका धिरेन राई, सिएम नवीन तण्डुकार, प्रेमकृष्ण महर्जन र एफएम रिजेन्द्र राजभण्डारीले आ–आफ्नो खेल जिते । बाँकी खेलाडीलाई पन्छाउन सफल रहे ।
