बेलायती सुरक्षा थिंक ट्यांक भन्छ– रक्षाखर्च बढाएको युरोपमा सैनिक अभाव

रुसले युक्रेनमाथि आक्रमण गरेपछि युरोपले रक्षाखर्च बढाएको छ। तर, सैन्य जनशक्तिलगायत उसको प्रतिरक्षा क्षमता अझै अपुग रहेको बेलायती सुरक्षा थिंक ट्यांकले बताएको छ।

डोनाल्ड ट्रम्प ह्वाइटहाउसमा फर्केपछि उनले युरोपेली सुरक्षा नीतिमा अमेरिकी अडानलाई परिवर्तन गर्न सक्ने र युद्धग्रस्त युक्रेनलाई सहयोग गर्न नसक्ने आशंका बढेको वेला इन्टरनेसनल इन्स्टिच्युट फर सेक्युरिटी स्टडिज (आइआइएसएस)ले यस्तो निष्कर्ष निकालेको हो।

आइआइएसएसले प्राग सुरक्षा सम्मेलनको आयोजना गर्दै गर्दा आफ्नो पछिल्लो रिपोर्ट प्रकाशित गरेको छ, जसमा राजनीतिज्ञहरू, सेनाका अधिकारीहरू र अन्य विशेषज्ञहरूलाई युरोपको रक्षा मुद्रा बढाउने उपायहरूबारे छलफल गर्न भेला गरिएको छ।

सन् २०२२ को फेब्रुअरीमा रुसले युक्रेनमाथि गरेको आक्रमणले युरोपको आफ्नो प्रतिरक्षा गर्ने क्षमतामा थुप्रै कमजोरी उजागर गरेको आइआइएसएसको अध्ययनले देखाएको छ।

‘सन् २०२४ मा नेटोका युरोपेली सदस्य राष्ट्रहरूको रक्षाखर्च रुसले क्रिमियालाई आफ्नो नियन्त्रणमा लिएको सन् २०१४ को तुलनामा करिब ५० प्रतिशत बढी हो,’ रिपोर्टमा भनिएको छ, ‘युरोपेली सशस्त्र बलहरू सबै सैन्य गतिविधिहरूमा फरक–फरक अवस्थामा संयुक्त राज्य अमेरिकामाथि निर्भर छन्।’

अध्ययनमा भनिएको छ, ‘शीतयुद्धको अन्त्यपछि र त्यसपछिका दशकहरूमा राजनीतिक निर्णयहरूको परिणामस्वरूप युरोपको शस्त्रागार गम्भीर रूपमा ह्रास भएको थियो। यस क्रममा युरोपमा रक्षा उद्योग पनि संकुचित भएको थियो।’

तर, सन् २०२२ देखि युक्रेनको आवश्यकतालाई सम्बोधन गर्दै हतियार निर्माता कम्पनीहरूले प्रतिक्रिया जनाएपछि हवाई प्रतिरक्षा र तोपखानालगायत केही क्षेत्रमा उत्पादनमा उल्लेख्य वृद्धि भएको छ। ‘उदाहरणका लागि, रेनमेटलको विश्वव्यापी वार्षिक १५५ एमएम गोलाबारुद उत्पादन दर १०  गुणा बढेर सात लाख पुगेको छ,’ जर्मनीको विशाल हतियार उत्पादक कम्पनीलाई संकेत गर्दै अध्ययनमा भनिएको छ।

हालैका वर्षहरूमा युरोपेली देशहरूले पनि स्थानीय उत्पादकहरूबाट अधिक हतियारहरू खरिद गरिरहेका छन्। किनकि महाद्वीपका नेटो सदस्यहरूले फेब्रुअरी २०२२ देखि युरोपेली प्रणालीमा उनीहरूले आधाभन्दा बढी खर्च गरेका छन्, जब कि ३४ प्रतिशत अमेरिकी प्रणालीमा खर्च गरिएको छ।

हतियार र गोलाबारुदको उत्पादन बढिरहेको वेला युरोपेली मुलुकहरूले सैन्यकर्मीको अभाव झेलिरहेका आइआइएसएसले जनाएको छ। आइआइएसएसले भनेको छ, ‘प्रमुख युरोपेली सशस्त्र बलहरू कमजोर छन्। धेरैले सेनाको अभाव झेलिरहेका छन्। उनीहरूले युवापुस्तालाई स्वयंसेवकका लागि पर्याप्त प्रोत्साहन पनि दिइरहेका छैनन्।’