- वि.सं २o८१ पौष ११ बिहीबार
कांग्रेसले ‘एक सयदिने विशेष अभियान’को समयावधि थप गरेको छ। १६ पुससम्मका लागि निर्धारण गरिएको अभियान १६ माघमा समापन गर्ने गरी समयावधि थप गरेको कांग्रेस मुख्यसचिव कृष्णप्रसाद पौडेलले जानकारी दिए।
केही जिल्लामा प्राकृतिक प्रकोपको असर, कतिपय जिल्लामा स्थानीय तह उपनिर्वाचनका कारण अभियान थाल्न भएको ढिलाइ र अन्य विविध कारणले केही जिल्लामा अभियानका तोकिएका कार्य सम्पादन हुन नसकेको उल्लेख गर्दै समयावधि थप गरिएको हो।
ती जिल्लाहरूले सहिद दिवसका दिन १६ माघमा समापन गर्ने गरी समयावधि थप गरिएको हो। जिल्लामा तोकिएका केन्द्रीय प्रतिनिधि, प्रदेश कार्यसमिति, जिल्ला कार्यसमितिलगायतका सबै समिति र सम्बद्ध सबैलाई थप अवधिमा सांगठनिक रूपले गर्न/गराउन निर्धारित सबै कार्यहरू व्यवस्थित रूपले अघि बढाउन कांग्रेसले निर्देश गरेको छ।
पार्टी केन्द्रीय कार्यसमितिको गत २३ साउनदेखि भदौ १६ गतेसम्म बसेको बैठकको निर्णयबमोजिम सांगठनिक गतिविधि प्रभावकारी बनाउन गत ७ असोजमा प्रारम्भ भएको ‘१०० दिने विशेष अभियान’ राष्ट्रिय एकता तथा मेलमिलाप दिवसको दिन यही १६ पुससम्मका लागि निर्धारण गरिएको थियो।
