अमेरिकी राष्ट्रपति चुनावमा एक करोड ७० लाखले गरिसके मतदान

अमेरिकामा राष्ट्रपतीय चुनावको मुख्य मतदानको दिन आउन अब दुई हप्ता मात्र बाँकी रहँदा एक करोड ७० लाखभन्दा बढी मतदाताले आफ्नो मत जाहेर गरिसकेका छन् । अग्रिम मतदानको यस उच्च संख्याले कोरोना भाइरस महामारीका कारण अमेरिकीमा अग्रिम मतदानको बानी बलियो गरी गढेको र अग्रिम मतदान सधैँका लागि अमेरिकी लोकतान्त्रिक प्रक्रियाको स्थायी विशेषता भएको संकेत गरेको छ । 

अमेरिकाका पचास राज्यमा अग्रिम निर्वाचनको अलग–अलग व्यवस्था छ । केही राज्यमा अग्रिम मतदानको व्यवस्था नै छैन । अग्रिम निर्वाचनको व्यवस्था भएका राज्यमा धेरैमा पनि मुख्य निर्वाचन हुने दिनको एक महिनाअघिदेखि वा दश दिनअघिसम्मबाट निर्वाचन खुला गरिन्छ । त्यस्तै अग्रिम मतदान गर्न चाहनेका लागि दुवै विकल्प उपलब्ध छन्, इमेलमार्फत गरिने मतदान र मुख्य चुनावअघि नै खुलेका मतदान केन्द्रमा मतदाता आफैँ गएर गरिने मतदान ।

सन् २०२० को राष्ट्रपतीय चुनावको समयमा विश्व कोरोना महामारीबाट गुज्रिरहेको थियो । महामारीको समयमा भिड गराउँदा खतरा उत्पन्न हुने डरले त्यतिवेला धेरैले अग्रिम मतदानमा भाग लिए । सन् २०२० को चुनावमा देशभर मतदान गर्ने बानीमा व्यापक परिवर्तन देखिएको थियो, जुन वर्ष झनडै ६ करोड ५६ लाख मतदाताले इमेलमार्फत मतदान गरे भने थप तीन करोड ५८ लाख मानिसले आफैँ चुनावको मुख्य दिनअघि नै मतदान केन्द्रमा गएर भोट दिए । अहिले विश्व महामारीबाट बाहिरिसकेको अवस्थामा पनि धेरै अमेरिकी मतदाताले अग्रिम मतदान रोज्नुले यो बलियो गरी बानीमा विकास भएको संकेत गर्छ । अग्रिम मतदान विकल्पहरू विस्तार गर्ने नयाँ कानुनले पनि यस उच्च संख्यामा योगदान गरेको हुन सक्छ । 

यसपटक धेरै राज्यमा अग्रिम मतदानको पहिलो दिनमा उच्च मतदानको रेकर्ड बनेका छन् । बिहीबार राष्ट्रपतीय चुनावमा महत्वपूर्ण भूमिका निभाउने ‘स्विङ स्टेट’मध्ये एक उत्तरी क्यारोलिनामा तीन लाख ५३ हजार मतपत्र खसेका थिए । जबकि, राज्य अझै ‘हेलेन’ नामक समुद्री आँधीको असरबाट पूर्ण बाहिरिसकेको छैन । त्यस्तै शुक्रबार लुइसियाना राज्यमा लगभग एक लाख ७७ हजार मतदाताले मतदान गरे, जुन यस राज्यको लागि कीर्तिमान हो । अग्रिम मतदान प्रवृत्तिको परिवर्तन जर्जियामा सबैभन्दा स्पष्ट देखियो, जहाँ मंगलबारदेखि अग्रिम मतदान खुलेदेखि लगभग हरेक दिन मतदाताले रकेर्ड मतदानको दैनिक रेकर्ड बनाइरहेका छन । चुनावी परिणाममा महत्वपूर्ण प्रभाव पार्ने यस राज्यमा झन्डै १५ लाखभन्दा बढी मतदाताले अग्रिम मतदान गरेका छन् ।