- वि.सं २o८१ भदौ २८ शुक्रबार
उदयपुरको चौदण्डीगढी नगरपालिका– ९ हडिया लालभित्तेमा एकजनाको पोखरीमा डुबेर मृत्यु भएको छ। पौडी खेल्न पोखरीमा पसेका सोही स्थानका वर्ष ६५ का गोरेमान राईको मृत्यु भएको हो ।
इलाका प्रहरी कार्यालय बेल्टारका प्रमुख इन्स्पेक्टर बबिन राईका अनुसार बिहीबार साँझदेखि हराएका मृतक राई शुक्रबार बिहान मृत फेला परेका हुन् । ‘गर्मीको कारण पौडी खेल्न सिँचाइको लागि निर्माण गरिएको पोखरीमा गएका रहेछन्, पौडी खेल्न नआउने रहेछ । जसको कारण पोखरीमै डुबेर मृत्यु भएको पाइएको छ,’ उनले भने ।
मृत्यु हुने राई विगत २५–३० वर्षदेखि भारत बस्दै आएका थिए । तर, उनी एक वर्षअघि मात्र लालभित्तेमा आएर दाजु सीताराम राईको घरमा बसेका थिए। उनले मृतक राईको शव पोस्टमार्टमका लागि नगर अस्पताल बेल्टार लैजाने तयारी भइरहेको पनि जानकारी दिए ।
