दुबईमा ‘उत्सव र उमंग, सिटी एक्सप्रेससँग’ सांगीतिक कार्यक्रम सम्पन्न

सिटी मनी ट्रान्सफरले दुबईमा सांगीतिक कार्यक्रम सम्पन्न गरेको छ। सिटी एक्सप्रेसले युएईस्थित बरदुबईको एसके-७ क्लबमा ‘उत्सव र उमंग, सिटी एक्सप्रेससँग’ शीर्षकमा सांगीतिक कार्यक्रम आयोजना गरेको छ।

कार्यक्रमको उद्घाटन सिटी एक्सप्रेस मनी ट्रान्सफरका प्रबन्ध–निर्देशक चन्द्र टन्डनले गरेका थिए। टन्डनले वैधानिक प्रणालीबाट पैसा पठाउन आग्रह गर्दै यसरी पठाएको पैसाले राष्ट्रलाई ठूलो सहयोग पुर्‍याएको बताए।

कार्यक्रममा टन्डनले सिटी एक्सप्रेस मनी ट्रान्सफरले विदेशमा रहेका नेपालीहरूको कमाइलाई सुरक्षित रूपमा पठाउन सहयोग गर्न पाउँदा आफूलाई खुसी लागेको बताए। साथै, कार्यक्रममा सहभागी सबैलाई धन्यवाद दिँदै नेपालीको मनोरञ्जनका लागि यस्ता कार्यक्रम आयोजना गर्दा थप सन्तुष्टि मिलेको पनि उनले व्यक्त गरे।

सांगीतिक कार्यक्रमले क्लबलाई उल्लासमय बनाएको थियो। नेपालका प्रसिद्ध कलाकारहरूले आफ्ना प्रस्तुति दिएर दर्शकलाई मन्त्रमुग्ध पारे। चर्चित हास्य कलाकार तथा सिटी एक्सप्रेस मनी ट्रान्सफरका ब्रान्ड एम्बेसडर जितु नेपालको प्रस्तुति दर्शकले निकै रुचाएका थिए।

यस्तै, चर्चित आधुनिक गायिका मिलन नेवारको स्वरले कार्यक्रमलाई थप भव्य बनाएको थियो। लोकप्रिय लोकदोहोरी गायक खेम सन्चुरी र गायिका शान्तिश्री परियारले गीतमार्फत उत्कृष्ट प्रस्तुति दिएका थिए भने कलाकार अञ्जली अधिकारीले विशेष प्रस्तुति दिएकी थिइन्।

सिटी एक्सप्रेस मनी ट्रान्सफरको सेवा प्रयोग गरेर युएईबाट थुप्रै नेपालीले आफ्नो घरपरिवारमा सुरक्षित तरिकाले आफ्नो दुःखको कमाइ पठाउन सकिरहेका छन्। आफ्नो ग्राहक वर्ग तथा युएईस्थित सम्पूर्ण नेपालीलाई मनोरञ्जन दिलाउने हेतुले यो कार्यक्रम आयोजना गरिएको सिटी एक्सप्रेस मनी ट्रान्सफरले जनाएको छ।

सिटी एक्सप्रेस मनी ट्रान्सफरले रेमिट्यान्स क्षेत्रमा आफ्नो छुट्टै पहिचान बनाउँदै विगत १७ वर्षदेखि संसारभरबाट विप्रेषण सेवा प्रदान गर्दै आइरहेको छ। हालै सिटी एक्सप्रेस मनी ट्रान्सफरले सिटी पे वालेटमार्फत अनलाइन भुक्तानीको सेवा सञ्चालन गरेको छ।