खेलकुद प्रिन्ट संस्करण

आइपिएलमा सूर्यकुमारको दोस्रो शतक

मुम्बई इन्डियन्सका सूर्यकुमार यादवले इन्डियन प्रिमियर लिग (आइपिएल)मा दोस्रो शतक लगाएका छन् ।आइपिएलअन्तर्गत सोमबार राति भएको खेलमा सूर्यकुमारले सन्राइजर्स हैदराबादविरुद्ध शतकीय इनिङ्स खेलेका थिए । उनकै शतकको मद्दतमा मुम्बईले हैदराबादलाई सात विकेटले हरायो । हैदराबादले २० ओभरमा आठ विकेट गुमाएर एक सय ७३ रन बनाएको थियो । मुम्बईले १७.२ ओभरमा तीन विकेटको क्षतिमा जित निकाल्यो । सूर्यकुमार यादवले तिलक वर्मासँग चौथो विकेटका लागि एक सय ४३ रनको नटआउट साझेदारी गरेका थिए । 

सूर्यकुमारले मुम्बईका पूर्वकप्तान रोहित शर्माको शतक संख्या बराबरी गरेका छन् । रोहितले दुई सय ५४ आइपिएल खेलमा दुई शतक लगाएका छन् । चालू सिजनमा पनि रोहितले एक शतकीय इनिङ्स खेलेका छन् । सूर्यकुमारले रोहितको बराबरी गर्न एक सय ४७ इनिङ्स खेले । मुम्बईका लागि पूर्वकप्तान सचिन तेन्दुलकरले ७८ खेलमा शतक लगाएका छन् । यसैगरी, सनथ जयसूर्या र लेन्डल सिमन्सले समान एक शतकीय इनिङ्स खेलेका छन् । भारतका लागि टी–२० फम्र्याटमा धेरै शतकीय इनिङ्स खेल्ने खेलाडीमा रोयल्स च्यालेन्जर्स बेंग्लोरका विराट कोहली हुन् । उनले अहिलेसम्म नौ शतक खेलेका छन् । 

मुम्बईका रोहितले आठ शतकका साथ दोस्रो स्थान कब्जा जमाएका छन् । चेन्नई सुपर किंग्सका रितुराज गायकवाडल, लोकेश राहुल तथा सूर्यकुमार यादवले समान ६ शतक बनाएका छन् । हैदराबादविरुद्धको सूर्यकुमार र तिलकबीचको साझेदारी मुम्बईका लागि चौथो विकेटका लागि अहिलेसम्मकै सर्वाधिक हो । सन् २०१५ मा कोरी एन्डसन र रोहितले कोलकाता नाइट राइडर्सविरुद्ध एक सय ३१ रनको साझेदारी गरेका थिए । यसैगरी, सन् २०१२ मा किरन पोलार्ड र अम्बाती राइडूले बेंग्लोरविरुद्धको खेलमा एक सय २२ रन जोडेका थिए ।