खेलकुद प्रिन्ट संस्करण

चौथो मिल्स गोल्डकप : गोलबजारलाई हराउँदै कोशी प्रहरी सेमिफाइनलमा

साबिक विजेता गोलबजार स्पोर्टिङ सिराहालाई टाइब्रेकरमा ४–३ ले स्तब्ध पार्दै कोशी प्रदेश प्रहरीले अन्तिम दुई स्थान पक्का गरेको हो

साबिक विजेता गोलबजार स्पोर्टिङ क्लब सिराहालाई टाइब्रेकरमा ४–३ ले हराउँदै कोशी प्रदेश प्रहरी कार्यालय रानी विराटनगर चौथो मिल्स गोल्डकप फुटबल प्रतियोगिताको सेमिफाइनलमा प्रवेश गरेको छ । विराटनगरको जुटमिलको खेलमैदानमा सोमबार भएको अन्तिम क्वार्टरफाइनलको विजेता कोशीले बिहीबार घरेलु टोली पेमा युवा क्लब विराटनगरसँग खेल्नेछ । निर्धारित समयसम्म २–२ को बराबरी भएपछि सेमिफाइनल पुग्ने टोलीको छिनोफानो टाइब्रेकरबाट भएको हो । कोशीका उज्ज्वल राई, सन्देश विक, विवेक राई र सुमित प्रधानले गोल गरेका थिए । 

गोलबजारका विनोद राई र निरजल मुक्ताङले मात्र गोल गरे । गौरव श्रेष्ठ र मीन धिमालको प्रहार कोशीका गोलरक्षक पुरन राईले उत्कृष्ट बचाए । उनी खेलका म्यान अफ दी म्याच भए । खेलमा पहिलो अग्रता गोलबजारले १२औँ मिनेटमा लियो । निशान्त लिम्बूले सन्दीप लिम्बूको सटिक पासमा डिबक्सभित्र गोल गरे । गोलबजारले पहिलो हाफमा बराबरी गोल फर्काउने निकै प्रयास गरेको थियो । तर, कोशीको बलियो डिफेन्स कोशीका खेलाडीले तोड्न सकेका थिएनन् । दोस्रो हाफमा गोलबजार आक्रामक रूपमा प्रस्तुत भएको थियो । खेलको ८९औँ मिनेटमा रमेश राजवंशीले गोल गर्दै गोलबजारलाई १–१ गोलको बराबरीमा ल्याए । 

अभिषेक आलेमगरले निकालेको पासलाई रमेशले सहजै बराबरी गोल गरेका हुन् । सकिन दुई मिनेट बाँकी रहँदा गोलबजारका विनोद राईले अप्रत्याशित रूपमा २–१ को गोल गरे । गोलबजारको अग्रता एक मिनेटभन्दा बढी टिकेन । कोशी प्रहरीका विवेक राईले खेललाई २ गोलको बराबरीमा ल्याए । खेलको अन्तिममा गोलबजारका खेलाडी सम्हालिन नसक्दा उपाधि जित्ने सपना चकनाचुर भयो । प्रतियोगिताको बुधबार हुने पहिलो सेमिफाइनलमा एपिएफले पकली सुनसरी र कनकाई स्पोर्टिङ क्लब सुरुंगा झापाको सामना गर्नेछ ।