Skip This
राष्ट्रिय सभाको नयाँ उपाध्यक्ष चयन गर्न आज मतदान हुँदै छ। आज दिउँसो सवा १ बजे बस्ने बैठकले उपाध्यक्ष चयन गर्दै छ।
उपाध्यक्षमा एमालेबाट विमला घिमिरे र कांग्रेसबाट विष्णुदेवी पुडासैनी उम्मेदवार छन्। दुवैले निर्वाचन कार्यतालिकाअनुसार हिजो उम्मेदवारी दर्ता गराएका हुन्।
एमाले उम्मेदवार घिमिरेलाई सत्ताघटकका दलहरूको साथ रहेकाले उनको जित सुनिश्चित देखिएको छ।
सत्तागठबन्धनमै रहेको एकीकृत समाजवादीले भने कसैलाई मतदान नगर्ने जनाएको छ। ५८ सदस्यीय सभामा निर्वाचित हुन ३० सांसदको समर्थन आवश्यक पर्छ। सत्तागठबन्धनसँग माओवादीका १७, एमालेका ९, एकीकृत समाजवादीका आठ र जसपाका चार गरी ३९ सांसद छन्। वामदेव गौतमसमेत जोड्दा यो संख्या ४० पुग्छ। समाजवादीका आठ सांसदले मतदान नगरे पनि एमाले उम्मेदवार घिमिरेको पक्षमा बहुमत देखिएको छ।
सभाको अध्यक्षमा माओवादीका नारायण दाहाल निर्वाचित भएपछि सोही पार्टीबाट उपाध्यक्ष रहेकी उर्मिला अर्यालले राजीनामा दिएसँगै उपाध्यक्ष पद रिक्त छ।
