अर्थ प्रिन्ट संस्करण

बैंकको ऋण तिर्न सहज वातावरण गराउन माग

बैंक तथा वित्तीय संस्थापीडित समन्वय समिति रुपन्देहीले बैंक तथा वित्तीय संस्थाबाट लिएको ऋण तिर्न सहज वातावरण बनाउन माग गरेको छ । समितिले शनिबार पत्रकार सम्मेलन गर्दै ब्याजदर घटाएर एकरूपता कायम गर्नुपर्ने र ऋण तिर्ने अवधि बढाउनुपर्ने माग गरेको हो ।

ऋणीहरूले आर्थिक मन्दी सकिएको मितिले पाँच वर्षसम्म कुनै पनि धितो लिलाम गर्न नपाइने व्यवस्था गर्न मागसमेत गरेका छन् । राज्यले आर्थिक मन्दी समाप्त भयो भनेर घोषणा गर्नुपर्ने र त्यसपछि पाँच वर्षको समय दिनुपर्ने उनीहरूको माग छ । 

बैंकको कर्जाको ब्याजदरमा भेदभाव भइरहेको भन्दै ऋणीलाई एउटै ब्याजदर कायम गर्न पनि माग गरिएको छ । समितिका अध्यक्ष दुर्गा पोख्रेलले आर्थिक संकटले व्यवसाय थला परेका कारण तोकिएको समयमा ऋण तिर्न सक्ने अवस्था नरहेको बताए । वित्तीय संस्थाले ऋणीबाट तोकिएको मितिमा साँवा–ब्याज नबुझाएमा बारम्बार तनाव दिने गरेको उनीहरूको गुनासो छ । 

कर्जा लगानीका बखत ऋणीसँग भएको सम्झौताको पालना नगरी आधारदर बढ्दा विनासूचना ब्याजदर वृद्धि गर्ने र आधारदर घट्दा ब्याजदर नघटाउने कार्य तत्काल रोकेर ऋण सम्झौताका बखत कायम ब्याजदर लागू गर्न पनि उनीहरूले माग गरेका छन् । कर्जाको साँवा तथा ब्याज भुक्तानीमा ढिलाइ भएको नाममा बैंकहरूले आफू खुसी लगाउँदै आएको जरिवाना खारेज गर्नुपर्ने माग पनि उनीहरूको छ ।