- वि.सं २o८१ बैशाख २३ आइतबार
कपिलवस्तु प्रहरीले भारतबाट भन्सार छली गरी नेपाल भित्र्याइएको दुई लाख रुपैयाँबराबरको अवैध कपडा बरामद गरेको छ।
जिल्लाको बहादुरगन्ज र मर्यादापुरमा चेकजाँचको क्रममा उक्त कपडा बरामद भएको जिल्ला प्रहरी कार्यालय कपिलवस्तुले जनाएको छ।
वरिष्ठ सइ शिवकुमार वलीको कमान्डमा खटिएको इलाका प्रहरी कार्यालय बहादुरगन्जको प्रहरी टोलीले कृष्णनगर नगरपालिका– ८ बाट एक लाख ३० हजार मूल्यबराबरको कपडा बरामद गरेको हो। पिकअप जिपमा लुकाएर ल्याउँदै गरेको सुट, टिसर्ट, सुरुवाल, कुर्ता बरामद भएको प्रहरीले जनाएको छ।
यसैगरी, यशोधरा गाउँपालिका– ७ मर्यादापुरबाट ५० थान साडी बरामद भएको छ। भन्सार छलीको उक्त साडीको अनुमानित मूल्य ७० हजार रहेको छ। बरामद भएका कपडाहरू कृष्णनगर र सुठौली भन्सार कार्यालयमा पठाइएको प्रहरीले जनाएको छ।
