ठेक्का हत्याएर ठेकेदार फरार, खोज्दै प्रशासन

जिल्लाभरका सडक, पुल, स्वास्थ्य चौकी, विद्यालय भवन, सिँचाइ, खानेपानीलगायतका विभिन्न पूर्वाधार विकास योजनाको भुक्तानी लिएर वर्षौँसम्म निर्माण सुरु नगर्ने ठेकेदारको सूची बनाएर जिल्ला प्रशासन कार्यालय, बाजुराले खोजी सुरु गरेको छ । विकास निर्माणको काममा परेको बाधा र जिल्लावासीले भोग्नुपरेको सास्तीलाई ध्यानमा राखेर कामलाई तीव्रता दिन निर्माण व्यवसायीहरूको खोजी सुरु गरिएको प्रमुख जिल्ला अधिकारी भीमकान्त पौडेलले बताए ।

उनका अनुसार निर्माण व्यवसायीको ढिलासुस्तीकै कारण दर्जनौँ योजना बाजुरामा अलपत्र छन् । ठेक्का लिने, तर काम नगरी बेपत्ता हुने  ठेकेदारको संख्या बढ्न थाले पछि जिप्रकाले चासो देखाएको हो । अहिले स्थानीय तह, राजनीतिक दल, सरोकारवाला निकायलगायतको सहयोगमा निर्माण व्यवसायीको खोजी थालिएको प्रजिअ पौडेलले बताए ।

उनको सक्रियतामा जिल्लामा रहेका संघ तथा प्रदेशमातहतका कार्यालयका प्रमुख र निर्माण व्यवसायी राखेर शुक्रबार समन्वयात्मक बैठकसमेत राखिएको थियो । ठेक्का सम्झौतामा उल्लेख भएका अधिकांश योजनाहरूको निर्माण गरिसक्ने मिति गुज्रिँदा पनि निर्माण नै सुरु नभएको जिप्रकाले जनाएको छ । ‘निर्माण कार्य अघि बढाउन ठेकेदारलाई ताकेता गर्दा वास्ता गर्न छाडेका छन् । फोनसमेत उठाउने गरेका छैनन्,’ प्रजिअ पौडेलले भने ।

जयबागेश्वरी र गुदुखाती स्वास्थ्य चौकी भवन, बार्जुगाको पुल, साँफे–मार्तडी सडकको बल्दे सडकखण्ड, मार्तडी–कोल्टीको चुथी, ढम्कने, पाण्डुसैन सडकखण्ड, सेरा आटीचौर कालोपत्रेमा सबैभन्दा ढिलासुस्ती देखिएको छ । पहिलो चरणमा ठेकेदार कम्पनीको सूची, कामको अवस्था र योजनाको प्रगति संकलन गर्ने र विषयलाई खुला छलफलका रूपमा अघि बढाउने गरी बैठक सकिएको छ । पूर्वाधार विकास कार्यालयले मार्तडी–कोल्टी सडकको कामलाई तीव्रता दिई अप्ठ्यारो ठाउँबाट काम सुरु गरी बाटो सहज गर्नतर्फ ध्यान दिने र विकासे कार्यालयले आवश्यकताका आधारमा निर्माणका कामलाई प्राथमिकीकरण गरी निर्माण कार्यलाई निरन्तरता दिने बैठकले निर्णय गरेको छ ।