पर्सा राष्ट्रिय निकुञ्जबाट निस्केको पाटेबाघको आक्रमणबाट बुधबार रौतहट बौधीमाई नगरपालिकामा दुईजना घाइते भएका छन्। बाघको आक्रमणबाट रौतहट बौधीमाई नगरपालिका– ३ मटेर्वा गाउँका ३० वर्षीय कृष्ण साह बनियाँ र ३५ वर्षीय राजु साह बनियाँ घाइते भएका हुन् ।
पूर्व–पश्चिम लोकमार्गअन्तर्गत बाराको पथलैया–निजगढ सडकखण्डस्थित पिलुवानजिक ना.३६प ५०११ नम्बरको मोटरसाइकलमा सवार उनीहरूलाई बाघले पछाडिबाट आक्रमण गरेको घाइते कृष्ण साह बनियाँले बताए ।
बाघको आक्रमणपछि सडकमा लडेका उनीहरूलाई त्यस रुटमा चल्ने बसका रहेका यात्रुले थप उद्धार गरेका थिए । बाघको आक्रमणमा परी राजुको दायाँ हात, बायाँ खुट्टा र टाउकोमा चोट लागेको छ। चालक कृष्ण सडकमा लडेकाले दुवै हातमा चोट लागेको छ।
घाइते दुवैको निजगढ नगरपालिका– ९ स्थित निजगढ सामुदायिक अस्पतालमा उपचार भइरहेको इलाका प्रहरी कार्यालय निजगढले जनाएको छ।