Skip This
एकीकृत समाजवादीमा भौतिक योजना तथा निर्माणमन्त्री प्रकाश ज्वालालाई सरकारबाट फिर्ता बोलाउने विषयमा छलफल भएको छ।
गत १३ पुसमा बालकुमारीमा दुईजनाको ज्यान जाने गरी भएको घटना जाँचबुझ आयोगको प्रतिवेदनले घटनामा मन्त्री ज्वाला पनि दोषी रहेको ठहर गरेपछि पार्टीको आज बसेको बैठकमा उनलाई फिर्ता बोलाउने विषयमा एकीकृत समाजवादीमा छलफल भएको हो।
बैठकले आयोगको प्रतिवेदन अध्ययन गरेपछि मन्त्री ज्वालालाई सरकारबाट फिर्ता बोलाउने विषयमा निर्णय लिने भएको छ। बैठकमा भएको छलफलबारे जानकारी दिँदै पार्टीका उपाध्यक्ष प्रमेश हमालले पार्टीको आजको बैठकमा मन्त्री ज्वालाका विषयमा छलफल भए पनि आयोगको रिपोर्ट हेरेर निर्णय गरिने राससलाई जानकारी दिए।
जाँचबुझ आयोगले मन्त्री ज्वालासहित तीनजनालाई दोषी ठहर गरेपछि उनलाई राजीनामा गराउन पार्टीमा केही नेताहरूले सुझाव दिएको पनि उनले जानकारी दिए। (रासस)
