नेपालका सबै मुख्य बलरको टाउकोदुखाइ बनेका क्यानडाका टप अर्डर ब्याटर पर्गत सिंह अर्धशतक बनाएलगत्तै पेभेलियन फर्किएका छन् । ५८ बलमा नौ चौकाको मद्दतमा ५० बनाएका पर्गतलाई नेपाली पार्टटाइम बलर कप्तान रोहितकुमार पौडेलले आउट गराएका हुन् ।
२.५ ओभरमा १९ रन हुँदा पहिलो, ५.६ ओभरमा ३५ रन हुँदा दोस्रो विकेट गुमाएको क्यानडाले १९.४ ओभरमा एक सय १४ रन बनाएपछि मात्र तेस्रो विकेट गुमायो । पर्गतले निकोलास किर्टोनसँग मिलेर ७९ रनको साझेदारी गरे । निकोलस अहिले पनि क्रिजमा छन् ।
सबै बलरलाई सहजै खेलिरहेका पर्गतविरुद्ध कप्तान रोहित आफैँ बलिङमा उत्रिएका थिए । रोहितविरुद्ध पनि ठूलो सट प्रहार गर्ने चक्करमा उनी ललितनारायण राजवंशीको हातबाट क्याचआउट भए ।
कीर्तिपुरस्थित त्रिवि खेलमैदानमा टस जितेर ब्याटिङ गरेको नेपालले निर्धारित ५० ओभरमा अलआउट हुँदै दुई सय २४ रन बनाएपछि क्यानडा जवाफी ब्याटिङमा छ ।