दैलेखको भैरवी गाउँपालिका– ४ को गडजिउलामा बस्दै आएको राउटे समुदायकी एक बालिकाको उपचार अभावमा ज्यान गएको छ । हरिबहादुर शाहीकी १२ वर्षीया छोरी दुर्गाको बिहीबार राति मृत्यु भएको हो ।
बालिका एक महिनादेखि बिरामी थिइन्। राउटे समुदायसँग निकट भएर काम गरिरहेका अभियन्ता लालबहादुर खत्रीले प्रभावकारी उपचार अभावमा ज्यान गएको बताए । दुर्गा हरिबहादुरकी एक मात्र छोरी थिइन्। उनका दुई छोरा छन् ।गडजिउलामा बस्दै आएका राउटे समुदाय शुक्रबार नै चामुन्डाबिन्द्रासैनी नगरपालिका– ४ सुइयातडामा बसाइँ सरेका छन् । पछिल्ला वर्ष राउटे समुदायको जनसंख्या घट्दै आएको छ । अहिले राउटेको संख्या एक सय ३७ छ ।
यसमध्ये बालबालिकाको संख्या ६५ छ । फिरन्ते जीवन बिताउने राउटेमा पछिल्लो समय विभिन्न स्वास्थ्य समस्या देखिन थालेको छ । ‘चिसो बढेसँगै राउटे समुदायमा समस्या बढ्दै गएको छ । चिसो भुइँमा रात कटाउनुपर्ने अवस्थाका कारण स्वास्थ्य समस्या बढेको छ । बालबालिका झन् बढी समस्यामा छन्,’ खत्रीले भने।