७२ हजार घुस लिएको अभियोगमा रंगेहात पक्राउ परेका काठमाडौंको बुढानीलकण्ठ नगरपालिकाका सबइन्जिनियरलाई विशेष अदालतले सफाइ दिएको छ । काठमाडौंको बुढानीलकण्ठ नगरपालिकाका तत्कालीन सबइन्जिनियर विनोदकुमार पौडेलले शुक्रबार सफाइ पाएका हुन् ।
पौडेलले सडक निर्माणको अन्तिम भुक्तानी दिने प्रयोजनका लागि सेवाग्राहीसँग ७२ हजार रुपैयाँ घुस माग गरिरहेको सूचना पाएपछि अख्तियारको टोली पुगेको थियो । उक्त रकम लिइसकेको अवस्थामा पौडेल २२ साउन ०७८ मा पक्राउ परेका थिए ।
अख्तियार दुरुपयोग अनुसन्धान आयोगले अनुसन्धानपश्चात् १८ असोज ०७८ मा मुद्दा चलाएकोमा सबइन्जिनियर पौडेलले सफाइ पाएका हुन् । विशेषका अध्यक्ष टेकनारायण कुँवर, रामबहादुर थापा र मुरारीबाबु श्रेष्ठको इजलासले यस्तो फैसला गरेको हो ।