Skip This
सूर्यदर्शन बचत तथा क्रण सहकारीको ठगी प्रकरणमा पूर्वअध्यक्ष गीतेन्द्रबाबु राई (जिबी) का मुख्य सहयोगी पोखराका शिवबहादुर गुरुङ (महेन्द्र भोटे) पुर्पक्षका लागि थुनामा गएका छन् । जिल्ला अदालत कास्कीले थुनछेक बहसपछि सहकारीका पूर्वसञ्चालक सदस्यसमेत रहेका गुरुङ र सहकारीका सञ्चालक समिति सदस्य भविश्वर अर्याललाई बुधबार पुर्पक्षका लागि थुनामा पठाउन आदेश दिएको हो ।
प्रहरीले गुरुङविरुद्ध इन्टरपोलमार्फत डिफ्युजन नोटिस जारी गर्ने तयारीसमेत गरेको अवस्थामा उनी आफैँ आएर अदालतमा आत्मसमर्पण गरेका हुन् । गुरुङ एमालेको भ्रातृ संस्था युवा संघका केन्द्रीय उपमहासचिव हुन् । गुरुङ ०७९ वैशाखमा सम्पन्न स्थानीय तह निर्वाचनमा कास्कीको मादी गाउँपालिकाको अध्यक्षमा एमालेका तर्फबाट उम्मेदवार भएर पराजित भएका थिए । गुरुङ सहकारी ठगीको मुख्य आरोपी भनिएका पूर्वअध्यक्ष जिबीका मुख्य सहयोगी हुन् । जिबी र गुरुङ मिलेर सहकारीको रकम हिनामिना गरेको आरोप छ ।
सहकारीमा रहेको आफ्नो बचत फिर्ता नपाएपछि बचतकर्ताले पोखरा महानगरपालिका– १६ लामाचौरका किरण श्रेष्ठको संयोजकत्वमा सूर्यदर्शन बचतपीडित संघर्ष समिति गठन गरेका छन् । भवनसँगै सहकारीबाट गुरुङले एकपटक आठ करोड ५० लाख र अर्को किस्तामा दुई करोड ६१ लाख गरी ११ करोड एक लाख बढी रकम कर्जा लिएर अपचलन गरेको देखिएको उनले जानकारी दिए । जिबीबाट गुरुङको नाममा आएको पोखराको सो भवनपछि काठमाडौंस्थित जिबीले सञ्चालन गरेको स्वर्णलक्ष्मी बचत तथा क्रण सहकारी संस्थालाई पछि गुरुङले मञ्जुरीनामा दिएर १२ करोडभन्दा धेरै रकम निकालेको देखिएको श्रेष्ठले बताए ।
सहकारीका ठगी गरेको आरोप लागेका र प्रहरीले पक्राउ पुर्जी जारीसँगै अदालतमा मुद्दा दर्ता भएका १९ मध्ये हालसम्म चारजना पुर्पक्षका लागि थुनामा गएका छन् । १५ जना फरार छन् । बुधबार गुरुङ र अर्यालसँगै यसअघि १६ पुसमा सहकारीका उपाध्यक्ष जिल्ला रामेछाप लिखु तामाकोशी गाउँपालिका– ७ घर भएका कैलाशकुमार दर्लामी र सहकारीका कोषाध्यक्ष कुमार रम्तेललाई अदालतले २१ असोजमा पुर्पक्षका लागि थुनामा पठाउने आदेश दिएको थियो ।
