- वि.सं २o८१ बैशाख २४ सोमबार
रोक लगाइएका औषधिमा एसिक्लोफेनाक, लिनिग्ल्पिटन, लिनिल्प्टिन एन्ड मेटाफर्मिन र रिभारेक्सोवन हुन्
मधुमेह, दुखाई र ब्लड क्लटमा प्रयोग भइरहेका केही औषधिको प्रभावकारिता नभएको भन्दै उत्पादन र बिक्री–वितरणमा रोक लगाइएको छ । औषधि व्यवस्था विभागले सोमबार सूचना जारी गर्दै चार किसिमका औषधि उत्पादन र बिक्री–वितरणमा रोक लगाएको हो ।
विभागमा दर्ता भएका, तर हाल सो औषधिको सुरक्षा, प्रभावकारिता र सहनशीलता (सेफ्टी, इफिसियन्सी र टोलेरेबिलिटी)को हकमा प्राप्त विवरणका आधारमा ती औषधिको प्रभावकारिता राम्रो नभएको भन्दै रोक लगाइएको हो ।
रोक लगाइएका औषधिमा एसिक्लोफेनाक, लिनिग्ल्पिटन, लिनिल्प्टिन एन्ड मेटाफर्मिन र रिभारेक्सोवन छन् । एसिक्लोफेनाक ननस्टेरोइड एन्टिइन्फ्लामेन्टरी समूहको औषधि हो । जुन दुखाई र हड्डीमा हुने पोल्ने कम गर्न प्रयोगमा आएको थियो ।
लिनिग्ल्पिटन डाइट र एक्सरसाइजमा प्रयोग गरिने औषधि हो । तर, यो टाइप २ मधुमेहको समस्या भएका व्यक्तिको ब्लड प्रेसरका लागि समेत प्रयोग गरिन्छ । लिनिल्प्टिन एन्ड मेटाफर्मिन रगतको प्रेसर कम गर्न प्रयोग गरिन्छ । खासगरी टाइप २ मधुमेहका बिरामीमा यो औषधि प्रयोगका लागि चिकित्सकले सिफारिस गर्दै आएका छन् ।
रिभारेक्सोवन नामक औषधि ब्लड क्लट अर्थात् जमेको रगतको उपचारका लागि प्रयोग गरिन्छ । खासगरी स्ट्रोकको समयमा ब्लड क्लटबाट निम्तिने जोखिम कम गर्न रिभारेक्सोवनको सिफारिस गरिन्छ ।
यी औषधिको प्रभावकारितामा समस्या देखिएको भन्दै विभागले औषधि सल्लाहकार समितिबाट सिफारिस प्राप्त नहुँदासम्मका लागि नयाँ उत्पादन नगर्न र बजारमा बिक्री–वितरण भइरहेको ब्रान्डसमेत थप उत्पादन नगर्न भनेको हो ।
