रुकुम–पश्चिममा ठूलो मात्रामा प्याजको बिउ थन्किएको छ । बजार नपाउँदा जिल्लाभरमा गरेर करिब १४ मेट्रिकटन प्याजको बिउ थन्किएको हो ।
कृषि विकास कार्यालयका प्रमुख मीनबहादुर केसीले अहिलेको बजार मूल्यअनुसार करिब साढे ५६ लाख मूल्यबराबरको बिउ बिक्री नभएर थन्किएको बताए । जिल्लाका मुसिकोट नगरपालिका, सानीभेरी गाउँपालिका, बाँफिकोट गाउँपालिका र त्रिवेणी गाउँपालिकाका विभिन्न ठाउँमा गरी १४ मेट्रिकटन रेड क्रियोल जातको प्याजको बिउ बिक्री हुन नसेकेको उनको भनाइ छ ।
ठूलो मात्रामा बिउ बिक्री नहुँदा किसान चिन्तित बनेका छन् । गत वर्ष राम्रो मूल्य र बजार पाएर हौसिएका किसान यो वर्ष भने निराश बनेका छन् । बिउ बिक्री नहुँदा करिब साढे तीन सय बिउ उत्पादक किसान चिन्तित छन् । मुसिकोट–६ का बिउ संकलक भीमबहादुर बोहराले आफूसँग मात्र करिब १० क्विन्टल बिउ बाँकी रहेको जानकारी दिए । करिब २५ क्विन्टल बिउ भने बिक्री गरेको उनको भनाइ छ । आफूसँग एक सय १० किसानको बिउ रहेको र अझै ३० भन्दा बढी किसानसँग घरमै बिउ थन्किएर रहेको उनको भनाइ छ । बिउ थन्क्याएर राख्दा एकातिर बजारको चिन्ता छ भने अर्कोतिर मूल्यको समेत चिन्ताले किसानलाई सताइरहेको छ । समयमा बिक्री नहुँदा बिउ बिग्रिने चिन्तामा समेत किसान छन् ।
गत वर्ष किसानले प्याजको बिउको राम्रो मूल्य पाएका थिए । किसानले गत वर्ष प्रतिकिलो तीन हजार पाँच सय रुपैयाँसम्म मूल्य पाएकामा यो वर्ष त्यसको सात गुणा कम मूल्यमा पनि बजार पाउन सकेका छैनन् । यो वर्ष बिउले चारदेखि पाँच सय रुपैयाँसम्म मूल्य पाएको छ । यो मूल्यमा करिब १५ मेट्रिकटन प्याजको बिउ बिक्री भइसकेको कृषि विकास कार्यालयका प्रमुख केसीले जानकारी दिए । यो बिउ काठमाडौं, पोखरा, धनगढी, महेन्द्रनगर, दाङ, नेपालगन्जलगायतका ठाउँमा पठाइएको बताइएको छ । किसानले लागत मूल्यभन्दा निकै कममा बिउ बेच्न बाध्य भएको केसीको भनाइ छ । प्रतिकिलो प्याजको बिउ उत्पादनका लागि करिब एक हजार पाँच सय रुपैयाँ लागत पर्ने गरेको उनले बताए ।
बढी बिउ उत्पादन हुनु समस्या
गत वर्ष जिल्लाबाट १४ मेट्रिकटन प्याजको बिउ बिक्री भएको थियो । उत्पादन पनि यति नै भएको थियो । कम बिउ भएका कारण किसानले राम्रो मूल्य पनि पाए । गत वर्षकै मूल्यलाई हेरेर धेरै किसान प्याजको बिउ उत्पादनमा लागेपछि यो वर्ष गत वर्षको भन्दा दोब्बर बढी बिउ उत्पादन भएको कृषि विकास कार्यालयको भनाइ छ । यो वर्ष बिउले मूल्य र बजार नपाउनुमा यही कारण मुख्य रहेको प्रमुख केसी बताउँछन् । जिल्लामा थन्किएको बिउ बिक्रीका लागि पहल भइरहेको कृषि विकास कार्यालयले जनाएको छ ।