- वि.सं २o८o असोज ५ शुक्रबार
खानेपानी संस्थानको बुटवल शाखा कार्यालय प्रमुख सन्तोष साह भ्रष्टाचारका दुईवटा मुद्दामा दोषी ठहर भएका छन् । विशेष अदालतले अन्य दुई मुद्दामा भने उनलाई सफाइ दिएको छ ।
विशेषका अध्यक्ष श्रीकान्त पौडेल र सदस्य खुसीप्रसाद थारूको इजलासले यस्तो फैसला गरेको हो । अख्तियार दुरुपयोग अनुसन्धान आयोगले २१ असोज ०७७ मा साहसमेतका विभिन्न व्यक्तिलाई प्रतिवादी बनाई मुद्दा चलाएको थियो । जसमा दुईवटामा साह दोषी पाइएका हुन् ।
उपरजिस्ट्रार धनबहादुर कार्कीका अनुसार एउटा मुद्दामा कार्यालय प्रमुख साह र अनिता निर्माण सेवाको सञ्चालिका शान्ति रानालाई जनही दुई–दुई वर्ष कैद सजाय सुनाइएको छ ।
‘उहाँहरूबाट जनही आठ लाख २२ हजार रुपैयाँ जरिवाना भराउने फैसलामा छ । साथै, प्रतिवादी सन्तोष साहबाट आठ लाख २२ हजार रुपैयाँ असुलउपर गर्ने फैसला भएको छ,’ कार्कीले भने ।
साहलाई स्रोत नखुलेको रकमसहित धादिङबाट काठमाडौं आउँदै गर्दा अख्तियारले नियन्त्रणमा लिएको थियो । उनका साथ नगद दुई लाख ३३ हजार पाँच सय रुपैयाँ बरामद भएको थियो ।
उक्त रकम उनले बुटवलमा पाइप लाइन विस्तारको जिम्मा पाएको अनिता निर्माण सेवाबाट कमिसन लिएको खुलेको थियो । उक्त निर्माण कम्पनीकी सञ्चालक शान्ति रानाले निर्माण सेवाको कम्पनीबाट आठ लाख २२ हजार रुपैयाँ कार्यालय प्रमुख साहका बुबा रामनारायण साहु सुडीको खातामा हालिदिएकी थिइन् । जसपछि सन्तोषले उक्त रकम निकालेका हुन् ।
अख्तियारले साहका साथै खाता सञ्चालक उनका पिता रामनारायणलाई पनि मतियार मानी प्रतिवादी बनाएको थियो । यसका साथै कमिसन दिने शान्तिलाई पनि मुद्दा चलाएकोमा दुईजनामाथि अभियोग ठहर भएको हो ।
साह पक्राउ परेकै दिन अरू व्यवसायीसँग पनि उनले कमिसन लिने गरेको खुलेको थियो । साहले स्मार्ट सप्लायर्सबाट दुई लाख ७५ हजार रुपैयाँ आफ्नो बैंक खातामा जम्मा गर्न लगाएका थिए ।
उक्त रकम पनि कमिसन रहेको अख्तियारको अनुसन्धानले देखाएको थियो । खानेपानी संस्थानले पानी तान्ने मेसिन खरिद गरेबापत उक्त कमिसन रकम स्मार्ट सप्लायर्सका सञ्चालक विकास जैनले साहलाई दिएका थिए ।
अख्तियारले साह र जैन दुवैलाई यस मुद्दामा प्रतिवादी बनाएको थियो । यस मुद्दामा पनि साह दोषी ठहरिएका छन् । विशेषका सूचना अधिकारीसमेत रहेका कार्कीका अनुसार जैन र साह दुवैलाई ६–६ महिना कैद र जनही दुई लाख ७५ हजार रुपैयाँ जरिवाना तोकिएको छ । कार्यालय प्रमुख साहबाट भने उक्त रकम असुल गर्ने फैसलामा उल्लेख छ ।
सन्तोष साह पक्राउ पर्दा उनीसँग फेला परेको कागजातका आधारमा अन्य चार व्यवसायीसँग पनि कमिसन लिएको हिसाब राखेको भेटिएको थियो । उक्त रकम आफ्ना पिताको नाममा रहेको खातामा जम्मा गर्न लगाएको भेटिए पनि यस सम्बन्धमा दायर दुवै मुद्दामा विशेषले उनलाई सफाइ दिएको छ ।
