- वि.सं २o८o असोज ३ बुधबार
भारतका सांसदहरू मंगलबारदेखि नयाँ संसद् भवनमा सरेका छन् । गणेश चौथीको साइत पारेर औपनिवेशिक युगको पुरानो संसद् भवनबाट सांसदहरू नयाँ संसद्मा सरेका हुन् । झन्डै एक सय वर्षअघि जनवरी १९२७ मा बेलायती शासकहरूले अघिल्लो संसद् निर्माण गरेका थिए ।
पहिले गोलाकार सांसद रहेकोमा अहिलेको नयाँ संसद् भवन भने त्रिभुजाकारको रहेको छ । नयाँ संसद् भवनमा आठ सय जनप्रतिनिधि सहजै बस्न सक्नेछन् । उक्त भवन मे २८ मा देशका प्रधानमन्त्री नरेन्द्र मोदीले उद्घाटन गरेका थिए ।
उद्घाटनका लागि देशकी राष्ट्रपतिलाई नबोलाइएको विरोधमा विपक्षी दलका सांसदहरूले भने सो समारोह बहिष्कार गरेका थिए । सभामुखले आजका लागि संसद्को विशेष बैठक आह्वान गरेका थिए ।
यसै सिलसिलमा नयाँ भवनमा विधायकहरू स्थानान्तरण भएका हुन् । आज भएको तल्लो सदनको बैठकमा सांसदमा महिला प्रतिनिधित्वको ३३ प्रतिशत ‘कोटा’ राख्ने विधेयक पेस गरिएको थियो ।
