पूर्वसभामुख दमननाथ ढुंगानाले प्रशासन संसदले बनाएको कानुनभन्दा बाहिर रहेर चलिरहेको बताएका छन्। ६५औँ संसद् दिवसको अवसरमा शनिबार काठमाडौंमा आयोजित कार्यक्रमलाई सम्बोधन गर्दै उनले यस्तो बताएका हुन्।
संसद्ले यसबारेमा ध्यान दिन नसकेको उल्लेख गर्दै उनले राजनीतिक पार्टीहरू सत्ताको स्वार्थमा डुबिरहेको टिप्पणी गरे। संसद्ले बनाएका कानुन प्रशासनले नमान्नु भनेको संसद्को अपमान भएको र अहिले सोही कुरा देखिएको उनको भनाइ थियो।
‘अहिले म सुन्दै छु, संसद्ले एउटा कानुन बनाउँछ तर अरूअरूकै आदेशबाट प्रशासन चलिरहेको छ। त्यो हेर्ने को हो? तपाईंहरू संसद्ले हेर्ने होइन। ल हाम्रा पार्टीलाई त सत्तामै फुर्सद भएन। हुनेलाई कसरी मेरो सत्ता बचाऊँ, नहुनेलाई सत्तामा जान हतारो छ। हाम्रो देशको राजनीतिमा अब त प्रदेशमा पनि सरिसक्यो। हामीले बनाएको कानुनलाई छल्ने गरी प्रशासनले जुन-जुन आदेश गरेको छ, त्यो संसद्को अपमान हो,’ ढुंगानाले भने।