समाचार डिजिटल संस्करण

यात्रुवाहक बसमा अनिवार्य  ‘डस्टबिन’राख्न पत्राचार

तनहुँको व्यास नगरपालिकाले यात्रुवाहक बसमा अनिवार्य ‘डस्टबिन’को व्यवस्था मिलाउन यातायात समितिलाई पत्राचार गरेको छ । व्यास नगरलाई सफा र स्वच्छ बनाउने उद्देश्यसहित जथाभावी फोहाेर फाल्ने कार्यलाई न्यूनीकरण गर्न यात्रुवाहक बसमा ‘डस्टबिन’को व्यवस्था मिलाउन पत्राचार गरेको हो।

जथाभावी रूपमा फोहाेर फालिदिँदा नगरपालिका दुर्गन्धित हुने भएकाले सवारीसाधनमा अनिवार्य ‘डस्टबिन’को व्यवस्थापनका लागि निर्देशनसहित पत्राचार गरिएको प्रमुख प्रशासकीय अधिकृत गंगालाल सुवेदीले जानकारी दिए। उनले भने, ‘नगरपालिकालाई वातावरणमैत्री सहर बनाउन नगर क्षेत्रभित्र गुड्ने सवारीसाधनमा अनिवार्य डस्टबिन राख्न भनेका छौँ।’

सवारीसाधनमा यात्रा गर्ने यात्रुलाई पनि जथाभावी रूपमा फोहाेर नफाल्न यातायात समितिमार्फत जानकारी गराउन निर्देशन दिइएको उनले बताए। जथाभावी रूपमा अटेर गरी फोहाेर फालेमा पहिलोपटक रु. तीन हजार र दोस्रोपटक रु. सात हजारसम्म जरिवाना गरिने उनले जानकारी दिए।

नगरपालिकाले पृथ्वी राजमार्ग यातायात समिति, स्थानीय यातायात प्रालि, व्यासभूमि यातायात प्रालि, ट्याक्सी व्यवसायी समिति र अटो रिक्सा व्यवसायी समितिलाई पत्राचार गरेको हो। नगरपालिकाले बजारका विभिन्न क्षेत्रमा फोहाेरमैला व्यवस्थापनसम्बन्धी सचेतनामूलक बोर्ड राखेको छ । नगरपालिकाका सरसफाइ शाखाका प्रमुख भाग्यशाली ढुंगानाका अनुसार बजारका मुख्य–मुख्य भागमा ‘जथाभावी फोहर नफालौँ’ तथा फोहाेर फालेमा हुने कानुनी कारबाहीलगायतका विषयमा सचेतना दिन सचेतनामूलक बोर्ड राखिएको छ ।

व्यास नगर फोहाेरमैला व्यवस्थापन कार्यविधि, २०७८ अनुसार दफा १४ (क) नगरपालिका वा सम्बन्धित वडाले तोकिएको समय र स्थानबाहेक अन्यत्र फोहाेरमैला निष्कासन गरी यत्रतत्र राखेमा वा फालेमा सोही कार्यविधिको दफा १९ अनुसार कसुर गर्ने व्यक्तिलाई जरिवाना गरिने उनले बताए। त्यस्ता व्यक्तिलाई पहिलोपटक रु. तीन हजार जरिवाना, दोस्रोपटक सोही कसुर गरेमा रु. तीन हजारदेखि रु. सात हजारसम्म जरिवाना र फोहाेरमैला उठाउँदा लाग्ने खर्चसमेत निजबाट असुलउपर गरिने जनाइएको छ।

साथै जथाभावी चोकचोकमा फुटपाट व्यवसाय नगर्न र पशु बध तोकिएको स्थानमा मात्र गर्न नगरपालिकाले आग्रह गरेको छ । उनले भने, ‘जथाभावी रूपमा फोहाेर फालिदिने प्रवृत्ति बढ्दो छ, त्यस्तो प्रवृत्तिलाई निरुत्साहित गर्न यो व्यवस्था गरेका हौँ । यसले गर्दा फोहाेरमैला व्यवस्थापनमा सहयोग पुग्ने विश्वास गरेका छौँ ।’ व्यास नगरपालिकाले बजार क्षेत्रको वडा नं. २, ३ र ४ बाट दैनिक रूपमा फोहाेर संकलन गर्दै आएको छ । नगरपालिकाका बजार क्षेत्रबाट दैनिक ११ टन फोहाेर संकलन हुने गरेको छ । 

स्थापनाको ३० वर्ष पुगिसक्दा पनि नगरपालिकाले फोहाेरमैला केन्द्र बनाउन भने सकेको छैन । व्यास नगरपालिका सरसफाइ केन्द्र निर्माणका लागि जग्गा व्यवस्थापनमा जुटे पनि उक्त प्रयास सफल हुन सकिरहेको छैन । 

व्यास नगरपालिकाले हाल वडा नम्बर १३ स्थित सोढेको बुद्धसिं राजमार्ग आसपास फोहाेरमैला विसर्जन गर्दै आएको छ । यसअघि व्यास– ३ मादीस्थित भतेरीमा फोहाेर फाल्दै आएको नगरपालिकाले उक्त ठाउँ मादीले कटान गरिदिएपछि चारकुनेमा जग्गा भाडामा लिएर फोहाेर फाल्दै आएको थियो । उक्त ठाउँ पनि फोहाेरले भरिएपछि फोहाेर फाल्ने ठाउँ नपाएर नगरपालिकाले सोढेमा फोहाेर फाल्दै आएको छ ।