१७औँ वार्षिकोत्सव विशेषांकफ्रन्ट पेजमुख्य समाचारसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २o८o जेठ १९ शुक्रबार
  • Monday, 15 July, 2024
सिंहदरबार परिसरभित्र निर्माणाधीन संसद् भवन । १५६ रोपनीमा मुख्यसहित १२ भवन बन्नेछन् । तस्बिर : दिपेन्द्र ढुंगाना
कमलराज भट्ट काठमाडाैं
२o८o जेठ १९ शुक्रबार o५:५५:oo
Read Time : > 2 मिनेट
ad
ad
ad
ad
फ्रन्ट पेज प्रिन्ट संस्करण

संसद् भवन निर्माण कछुवा गतिमा

वार्षिक १५ करोड भाडा तिरेर ०६४ देखि अन्तर्राष्ट्रिय सम्मेलन केन्द्रमा संसद्, हालसम्म डेढ अर्बभन्दा बढी भाडामा खर्च

Read Time : > 2 मिनेट
कमलराज भट्ट, काठमाडाैं
नयाँ पत्रिका
२o८o जेठ १९ शुक्रबार o५:५५:oo
  • तीन वर्षभित्र निर्माण सम्पन्न गर्ने गरी १ असोज ०७६ मा शिलान्यास, साढे पाँच अर्ब लागत, टुडी शेर्पा जेभी ठेकेदार कम्पनी
  • १५ असोज ०७९ मै निर्माण सम्पन्न गर्नुपर्ने आयोजना कोभिड महामारी, साइट क्लियर हुन समय लागेको र एलसी प्रतिबन्धले ढिलाइ भएपछि १५ चैतसम्म म्याद थप 
  • म्याद थपको दुई महिना बित्दा अर्थात् १७ जेठ ०८० मा भौतिक प्रगति ६३.९ र वित्तीय प्रगति ५३.०५ प्रतिशत मात्रै 
  • ठेकेदार कम्पनीले माग्यो थप एक वर्ष समय, १६ चैतदेखि लागू हुने गरी अर्काे ६ महिना म्याद थप्ने सरकारको तयारी, आउँदो असोजसम्ममा पाँचवटा भवन तयार भइसक्ने भवन विभागका महानिर्देशक सुरेन्द्रमोहन श्रेष्ठको दाबी

मुलुकमा पूर्वाधार निर्माणको गति कति सुस्त हुन्छ ? मुलुकको प्रमुख प्रशासनिक केन्द्र सिंहदरबार परिसरमा बन्दै गरेको राष्ट्रिय गौरवको आयोजना संसद् भवन निर्माणको कार्यप्रगतिले यसको सटीक जवाफ बताउँछ । राज्यको प्रमुख अंगमध्येको एक व्यवस्थापिकाकै भवन निर्माणमा चरम लापरबाही भएको छ । निर्माण व्यवसायी र सरोकारवाला निकायले आफ्नो सहजतामा काम गर्दा आयोजनाको कार्यप्रगति कछुवा गतिमा छ । 

आयोजनाको अनुगमनपछि सभामुख देवराज घिमिरेले भने–
जति सकिन्छ काम गर्दै जाउँ भन्ने तरिकाले बनाउन गाह्रो हुन्छ । कि त यसलाई न्यूनतम चाहिने समय थप्नुपर्‍यो, त्यतिवेलासम्म सकिन्छ भन्ने विश्वास पनि हुनुपर्‍यो, कि अब यति समय नपाउने भए मैले बनाउन सक्दिनँ भन्नुपर्‍यो । छाड्न पनि नपाउने, बनाउन पनि नसक्ने स्थिति भएर यसलाई अनन्त लाने कुरा बिल्कुल गर्नुहुँदैन ।

विशेष भवन निर्माण आयोजना समन्वय कार्यालयको तथ्यांकअनुसार मंसिरमा ६० प्रतिशत काम सम्पन्न भएको संसद् भवनको कार्यप्रगति मध्यजेठसम्म आइपुग्दा ६३.९ प्रतिशत मात्रै छ । ६ महिनामा करिब चार प्रतिशत मात्रै काम भएको छ । वित्तीय प्रगति त झन् ५३.०५ प्रतिशत मात्रै छ, अर्थात् तीन अर्बहाराहारी भुक्तानी भएको छ ।

संसद्को नयाँ भवनका लागि साढे पाँच अर्ब लागतमा तीन वर्षभित्र निर्माण सम्पन्न गर्ने गरी ठेकेदार कम्पनी टुडी शेर्पा जेभीसँग सम्झौता भरेर तत्कालीन प्रधानमन्त्री केपी ओलीले १ असोज ०७६ मा शिलान्यास गरेका थिए । शिलान्यास गर्दा ओलीले ०७९ को निर्वाचनपछि आउने संसद्को पहिलो अधिवेशन नयाँ भवनमा सञ्चालन हुने दाबी गरेका थिए । 

बिहीबार सभामुख देवराज घिमिरे, उपसभामुख इन्दिरा रानामगर र सहरी विकासमन्त्री सीता गुरुङ निर्माणाधीन भवनको निरीक्षणमा पुग्दा श्रमिकको न्यून उपस्थिति थियो । हाल अढाई सय श्रमिक परिचालन गरिएको र कार्यप्रगति ६३ प्रतिशत मात्रै रहेको ब्रिफिङ आयोजनाका अधिकारीबाट सुनेपछि सभामुख घिमिरेले लापरबाहीको हद भएको बताए । 

१५ असोजमा निर्माण सम्पन्न गर्नुपर्ने भवन आयोजना कोभिड महामारी, साइट क्लियर हुन समय लागेको र एलसी प्रतिबन्धले ढिलाइ भएको निर्माण व्यवसायी सुमन सुवेदीले बताए । त्यसपछि सहरी विकास तथा भवन निर्माण विभागले १५ चैतसम्मका लागि ६ महिना म्याद थपेको थियो । यो अवधि नाघेको दुई महिना बितिसक्दा कार्यप्रगति ६४ प्रतिशतहाराहारी छ । 

नयाँ म्याद थपका लागि विभागमा प्रक्रियामा छ । १६ चैतदेखि लागू हुने गरी १२ अक्टोबरसम्म अर्काे ६ महिना थप्ने तयारी रहेको विभागका महानिर्देशक सुरेन्द्रमोहन श्रेष्ठले बताए । आउँदो असोजसम्ममा पाँचवटा भवन तयार भइसक्ने उनको दाबी छ । एक सय ५६ रोपनीमा १२ वटा भवन बन्नेछन् । जसमा दुई हल, सचिवालय, पार्किङ, संसदीय दलका कार्यालय रहनेछन् । 

ठेकेदार कम्पनीले १६ चैतबाट लागू हुने गरी एक वर्ष समय मागेको छ । जब कि सरकार ६ महिना मात्रै थप्ने र हिउँदे अधिवेशन नयाँ भवनबाट चलाउने योजनामा छ । सहरी विकास मन्त्रालयका सचिव रवीन्द्र श्रेष्ठले हिउँदे अधिवेशन यहीँ राख्ने गरी काम सक्नुपर्ने बताए । ‘दैनिक ६ सय मान्छे परिचालन गर्नुस् । ६ महिनापछिको एलसी अहिले नै खोल्नुस् । समानान्तरमा कामहरू गर्न सकिन्छ । तपाईंको इफोर्ट पुगेको छैन । हिउँदे अधिवेशन यही स्पिडमा हुँदैन । इफोर्ड बढाऔँ, सहजीकरण गर्न हामी छौँ । ट्रसमा डिजाइन परिवर्तन गर्नुपर्ने हो भने पनि मिलेर गरौँ । तर हिउँदे अधिवेशनलाई लक्ष्य बनाऔँ,’ उनले भने । 

ad
ad
ad
ad