गण्डकी प्रदेशका मुख्यमन्त्री सुरेन्द्रराज पाण्डेले नागरिकले देख्ने र महसुस गर्ने गरी काम गर्ने बताएका छन्। नेपाली कांग्रेस बाग्लुङले आयोजना गरेको भेटघाट कार्यक्रममा बोल्दै उनले प्रदेश सरकार सबै नागरिकको साथमा रहेको अनुभूति दिलाउने बताए।

पाण्डेले आगामी आर्थिक वर्षमा आउने बजेटमा जनताको प्रत्यक्ष आवश्यकतासँग जोडिएका कार्यक्रम समावेश हुने उल्लेख गरे। ‘अब ल्याइने बजेट जनताको आवश्यकताका आधारमा आउँछ, कनिका छरेजस्तो बजेटले विकास हुन सक्दैन,’ उनले भने, ‘जनताले देखिने गरी, महसुस गर्ने गरी, अनुभूति गर्ने गरी काम गर्नेछौँ, त्यसको लागि हाम्रा योजना र बजेट पनि बृहत् प्रकारका हुनेछन्।’

उनले  मोटरबाटो, सिँचाइ, भवन निर्माणलगायतका कामको प्रगति जनताले प्रत्यक्ष देख्ने बताए। साना योजना र कामको लागि स्थानीय सरकारसँग समन्वय गर्ने मुख्यमन्त्री पाण्डेको भनाइ छ।