- वि.सं २o७९ चैत २६ आइतबार
कांग्रेस महामन्त्री गगनकुमार थापाले वर्तमान सरकारलाई काम गरेर देखाउन पाँच महिनाको समय मात्रै रहेको बताएका छन् ।
दाङ कांग्रेसले जिल्ला पार्टी कार्यालय घोराहीमा गरेको जिल्ला सम्मेलनलाई सम्बोधन गर्दै महामन्त्री थापाले प्रधानमन्त्री प्रचण्डलाई भेटेरै आफूले ध्यानाकर्षण गराएको बताएका हुन् ।
सरकार संख्याको अलमलमा पर्न नहुने भन्दै उनले शनिबार प्रधानमन्त्रीसँगको भेटमा काम गरेर देखाउन पाँच महिनाको समय मात्रै रहेको बताएको उनको भनाइ थियो ।
‘मैले हिजो मात्रै प्रधानमन्त्रीलाई भेट्ने अवसर पाएको थिएँ,’ प्रतिनिधिसभा सदस्यसमेत रहेका थापाले भने, ‘मैले उहाँलाई संख्याको अनुकूलतामा अलमलमा नपर्न र समयका बारेमा भ्रम नपाल्न स्पष्ट भनेको छु । हामीसँग पाँच वर्ष होइन, काम गरी देखाउन पाँच महिनाको समय मात्रै छ भनेको छु ।’
आमनागरिकमा सरकारलाई लिएर आएको अविश्वासको संकट विश्वासमा बदल्न पनि सरकारले कुरा नभई काम गर्नुपर्ने उनको भनाइ थियो ।
